Një emër për në Strasburg – Darian Pavli, kandidati për të zëvendësuar Ledi Biankun në GJEDNJ
Komisioni i Përzgjedhjes së kandidatëve në Gjykatën e të Drejtave të Njeriut ka përzgjedhur emrin që do t’i propozohet Strasburgut për të përfaqësuar Shqipërinë. Darian Pavli është tashmë kandidatura e vetme e qeverisë shqiptare, që ka kaluar fazën e parë të përzgjedhjes.
Ai është vlerësuar si kandidati që përmbush më shumë se të tjerët kriteret për të qenë zëvendësuesi i gjyqtarit aktual, që ka Shqipëria në GJEND, Ledi Bianku. Më datë 28 shtator, Komisioni i Përzgjedhjes së kandidaturave ka zhvilluar intervistimin e tre kandidatëve që dërgoi qeveria Rama. Në listën e kandidatëve, veç Darian Pavlit, ishte ish-gjyqtari i Gjykatës Kushtetuese, Sokol Berberi dhe pedagogia, Marjana Semini.
Pavli ka një karrierë prej më se 15 vitesh në sistemin e Drejtësisë. Ai ka ushtruar funksionin e ekspertit pranë organizatave si Soros apo Euralius.
Emri i tij do të votohet më 12 tetor do të kërkojë konsensus të gjerë për kandidaturën e Shqipërisë. Në rast se kjo nuk ndodh, atëherë procedura mund të rinisë nga e para.
Kjo është tentativa e pestë e Qeverisë për të gjetur kandidatin e përshtatshëm për në Strasburg, ndërkohë që 4 listat e para me nga 3 emra nuk janë pranuar nga Gjykata Ndërkombëtare e të Drejtave të Njeriut.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.