Një lojë për fëmijë mbi taksat dhe buxhetin publik – KE lançon portalin edukativ
Komisioni Europian ka lançuar një portal të ri edukativ për fëmijët dhe adoleshentët, në mënyrë që ata të mësojnë në një mënyrë argëtuese dhe interaktive mbi çështjet e taksave.
TAXEDU është një burim dixhital për të edukuar fëmijët me rëndësinë e taksave dhe se si ato prekin jetën e përditshme. Projekti shpreson se do të nxisë stimulimin e debateve të vazhdueshme mbi taksimin e drejtë.
Portali është plot me mjete mësimi në disa gjuhë, lojëra, video dhe materiale edukative që mësuesit t’i përdorin nëpër shkolla.
Komisioneri Pierre Moscovici, i cili mbulon çështjet financiare dhe ekonomike, taksat dhe doganat, u shpreh se ishte krenar për këtë projekt, pasi do të rrisë ndërgjegjësimin e njerëzve mbi taksat.
“Përmes lojërave online, të vegjlit mund të mësojnë në një mënyrë argëtuese se si shkollat e tyre, pishinat lokale dhe këndet e lojërave janë financuar dhe se si edhe ata një ditë do të ndihmojnë të ndërtojnë shërbime publike përmes taksave. Ne duam të nxisim një interes në çështjet e taksave dhe t’i përfshijmë të rinjtë në vendime që do të formësojnë të ardhmen e tyre”, u shpreh Moscovici.
Portali tanimë është online, së bashku me një lojë interaktive të quajtur TAXLANDIA, ku lojtarët mund të menaxhojnë financat publike dhe të marrin vendime mbi mbledhjen e taksave dhe shpenzimet.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.