Një mbyllje tjetër e qeverisë amerikane? – Trump për WSJ: Është “sigurisht një opsion”
Qeveria amerikane mund të mbyllet sërish. Paralajmërimi ka ardhur nga presidenti, Donald Trump, i cili tha se një mbyllje tjetër e qeverisë është ‘sigurisht’ një opsion teksa shprehu skepticizëm se Kongresi do të arrijë një marrëveshje për të financuar murin kufitar me Meksikën që ai ka kërkuar.
Sa i takon kësaj të fundit, Trump tha në një intervistë për ‘Wall Street Journal’ se shanset janë më të vogla se 50% që marrëveshja të arrihet para se financimi tjetër i qeverisë të kalojë më 15 shkurt.
Por, pavarësisht marrëveshjes, Trump ishte shprehur edhe më herët se në rast se do të ishte i pakënaqur me komisionin për diskutimet mbi kufirin me Meksikën, mbyllja e qeverisë do të rifillonte sërish pas kësaj date.
Presidenti shtoi më tej se ‘dyshonte’ të pranonte më pak se 5.7 miliardë dollarë për murin kufitar dhe se as do të pajtohej gjithashtu me dhënien e shtetësisë për ‘ëndërruesit’, emigrantët e paligjshëm në SHBA.
Trump nënshkroi të premten një marrëveshje për t’i dhënë fund përkohësisht mbylljes së qeverisë , e cila ishte më e gjata në historinë e SHBA. Kjo e fundit shkaktoi humbje pagash për rreth 800 000 punonjës federalë. Ndërkohë, disa sondazhe të realizuara së fundmi zbuluan se amerikanët fajësojnë presidentin Trump për mbylljen 35-ditore të qeverisë.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.