Një në katër persona në Turqi dëshiron të jetë mësues – Arsyet i jep ministri i Arsimit

Një në katër persona në Turqi dëshiron të jetë një mësues. Sipas një raport të OECD në të gjithë botën vetëm 5 për qind e njerëzve duan të jenë mësues, ndërsa në Turqi kjo shifër është 25 për qind.

Ministri i Arsimit në Turqi İsmet Yılmaz gjatë një vizite në provincën veriperëndimore të Bursës deklaroi se “kjo shifër e OECD reflekton perceptimin pozitiv për të qenë një mësues në Turqi”.

“Numri i nxënësve për klasë në Turqi ka rënë nga 36 në 24. Një mësues do të mësonte 28 nxënës në Turqi në vitet e mëparshme. Tani mësuesit mësojnë mesatarisht 12 nxënës”.

Një tjetër arsye favorizuese sipas ministrit është buxheti për arsimin  në Turqi, i cili qëndron mbi nivelin e OECD.

“Turqia aktualisht shpenzon 6.2 për qind të buxhetit të shtetit në arsim. Unë mendoj se shifra e vërtetë është akoma më e lartë. Në të kaluarën kemi qenë prapa vendeve të OECD, ku mesatarja është 5.2 për qind. Nuk ka asnjë vend në Europë që cakton më shumë investime në arsim se sa ne. Një mësues është investimi më i rëndësishëm për arsimin dhe edukimin e brezave”, shtoi Yılmaz.

Përkundrejt shifrave pozitive, Turqia ende ka studentët më të palumtur në botë, sipas një studimi të mëparshëm të OECD-së për 72 vende të botës, publikuar në prill të vitit të shkuar.

Rreth 540,000 studentë morën pjesë në studim. Anketa zbuloi se më shumë se 20 për qind të studentëve turq raportonin “pakënaqësi” për jetën.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.