Një ngadalësim pa “zarar” – Gjermani, bie prodhimi industrial, s`do ketë impakt në ekonomi

Prodhimi industrial në Gjermani pësoi një rënie të papritur gjatë muajit Qershor, tregojnë të dhënat e fundit.

Pavarësisht kësaj, gjatë tremujorit të dytë në tërësi, prodhimi ka pësuar rritje. Gjatë Qershorit, rënia fiksohet në 1.1% në terma mujorë, pas një rritje me 1.2% gjatë muajit Maj, tregojnë të dhënat e Ministrisë së Ekonomisë.

Të dhënat rezultojnë gjithashtu nën pritshmëritë e tregjeve dhe analistëve, që flisnin për një rritje me 0.2%. Gjithsesi, pozitiv mbetet fakti se, fabrikat dhe firmat e ndërtimit në ekonominë më të madhe të Europës prodhuan 1.8% më shumë gjatë tre muajve të dytë të vitit, në krahasim me tre muajt e parë.

Ekspertët argumentojnë se, të dhënat e Qershorit nuk do të kenë asnjë impakt në ecurinë e ekonomisë gjatë tremujorit, apo edhe më tej në performancën vjetore.

E vetmja gjë që mund të dëmtojë ekonominë gjermane, që është në formë si rrallëherë e si askush tjetër në kontinent, është ndonjë skandal i mundshëm që mund të përfshijë industrinë automobilistike gjermane, për emetimin e gazrave dhe mundësinë e ekzistencës së një karteli mes tyre. Makinat zënë një të pestën e eksporteve gjermane.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.