Një paralajmërim i ri për J&J / SHBA përmend raste të sëmundjes autoimune “Guillain-Barre”
Administrata e Barnave dhe Ushqimeve në SHBA, ka shtuar një paralajmërim për vaksinën e Johnson % Johnson, ku thekson se sipas të dhënave, ka një rritje të rrezikut të një sëmundjeje të rrallë neurologjike, në periudhën 6-javore pas injektimit. Në një letër drejtuar kompanisë, Agjencia federale klasifikoi se shanset e sindromës “Guillain – Barre” pas vaksinimit janë “shumë të ulëta”. Megjithatë, shtoi se marrësit e vaksinës së J&J duhet të kërkojnë ndihmë mjekësore nëse zhvillojnë simptoma si dobësi, ndjesi shpimi në trup, vështirësi në ecje apo me lëvizjet e muskujve të fytyrës. Thuajse 12.8 milionë njerëz kanë marrë vaksinën me një dozë të J&J në Shtetet e Bashkuara. Administrata e Barnave theksoi se ka patur 100 raste paraprake të sindromës tek marrësit e vaksinave, përfshirë 95 raste serioze që kërkonin shtrim në spital dhe një vdekje. J&J deklaroi se po diskuton me rregullatorët mbi rastet e sindromës Guillain-Barre. Kjo e fundit është një gjendje e rrallë neurologjike, nën të cilën sistemi imunitar i trupit sulmon veshjen mbrojtëse të fibrave nervore. Shumica e rasteve vijnë si pasojë e infeksionit bakterial apo viral dhe thuajse të gjithë rimëkëmben plotësisht. Kjo gjendje është lidhur në të shkuarën me vaksinimin, kryesisht në fushatën e vaksinimit gjatë gripit të derrit në SHBA në vitin 1976 dhe dekada më vonë, gjatë pandemisë së gripit H1N1 në vitin 2009. Sipas një deklarate të Qendrës për Kontrollin dhe Parandalimin e Sëmundjeve, shumica e rasteve ishin shfaqur tek burrat, kryesisht në moshë 50-vjeç e sipër. Sipas lajmërimeve, nuk ka patur raste shqetësuese tek vaksinat me teknologjinë e lajmëtarit të ARN, si ajo e Pfizer apo Moderna.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.