Një rezyme e Kampionatit – Çfarë solli Botërori i Fluturimeve për vendin tonë

Një vend i vogël si Shqipëria, për të cilën vitet e fundit po flitet shumë në portalet më të njohura botërore, arriti t’i tregojë të gjithëve se çdo gjë që marrim përsipër mund të realizohet me sukses. E kjo e vërtetuar më së miri me kampionatin Botëror të Fluturimeve të Lira me precizion që u zhvillua gjatë 10 ditëve të fundit në qytetin e Vlorës.

I finalizuar me sukses fundjavën që lamë pas, eventi i ndarjes së çmimeve për pilotët dhe skuadrat më të mira nga 28 shtete të botës, mblodhi së bashku përfaqësuesit më të lartë të shtetit, mbështetës dhe qytetarë, të cilët i shprehën mirënjohjen organizatorëve që i dhanë qytetit të Vlorës këtë mundësi.

Ashtu siç u shpreh edhe ministri i Energjetikës Damian Gjiknuri, Vlorën të gjithë kanë mundur ta shijojnë nga rrugët tokësore, por ky aktivitet tregoi se Vlora është akoma më e bukur nga ajri. Gjithashtu, ky aktivitet arriti që të sjellë të mira edhe të tjera për këtë qytet. Lungomare e Vlorës, për shkak të këtij organizimi përshpejtoi punimet duke qenë se dhe vetë kampionati do të zhvillohej pikërisht përgjatë kësaj shëtitoreje. Siç u shpreh edhe kryebashkiaku i Vlorës Dritan Leli, punimet vazhdojnë dhe me të njëjtin ritëm pune do të vazhdohet të punohet në mënyrë që të mos cenohet sezoni turistik veror dhe qarkullimi të jetë më i lehtë.

Pra, një aktivitet sportiv arriti atë që askush nuk mundi ta bëjë. Garuesit pjesëmarrës ndihen shumë të lumtur që arritën të njohin Shqipërinë dhe bukuritë e saj, duke premtuar që do të rikthehen përsëri për t’ua treguar edhe miqve të tyre.

Aktivitet të tilla duhet të organizohen sa më shumë në vendin tonë pasi janë marketingu më i mirë që mund t’i bëhet turizmit, i parë ndryshe si sektori më premtues për vendin tonë.

Olta Maçolli/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.