Një tjetër pakt mes OPEC – Do të zgjatet ulja e prodhimit deri në Mars 2020
Organizata e Vendeve Eksportuese të Naftës ra dakord në nisje të javës që të zgjasë uljen e prodhimit deri në Mars 2020, ndërkohë që vendet anëtare lanë pas konfliktet në mënyrë që të nxisin rritjen e çmimeve. Sekretari i Përgjithshëm i Organizatës, Manuel Quevedo, lajmëroi dakordësinë e kartelit për të zgjatur uljen e prodhimit në nivelet aktual me 9 muaj. Kjo lëvizje me shumë gjasa do të shqetësojë presidentin e SHBA, Donald Trump, që i ka kërkuar liderit të organizatës, Arabisë Saudite, që të rrisë prodhimin për të ulur çmimet. Nafta bruto është rritur me më shumë se 25% këtë vit, pasi Shtëpia e Bardhë vendosi sanksione ndaj Venezuelës dhe Iranit, çka ka ulur prodhimin e tyre.
OPEC dhe vendet aleate si Rusia, kanë ulur prodhimin që prej vitit 2017 për të parandaluar rënien e çmimeve, ndërkohë që Shtetet e Bashkuara kanë rritur prodhimin në nivel rekord, duke u kthyer në prodhuesin më të madh në botë. Shqetësimet mbi kërkesën botërore të naftës si pasojë e luftës tregtare Kinë-SHBA, kanë shtuar sfidat e kartelit. Shtetet e Bashkuara, që përbëjnë gjithashtu konsumatorin më të madh në botë të naftës, nuk bëjnë pjesë e OPEC dhe në paktin e uljes së prodhimit. Rritja e çmimeve të naftës mund të shtojë koston e benzinës, që përbën problemin kryesor për Donald Trump.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.