“Një vend i lig armik”, presidenti Meta i kundërpërgjigjet liderit iranian
Më shumë se një duzinë raketash u lëshuan nga territori iranian drejt bazave amerikane në Irbil dhe Al Asad, në perëndim të Bagdadit, mëngjesin e ditës së sotme, në shenjë hakmarrjeje ndaj vrasjes së gjeneralit Qassem Soleimani.
Presidenti Trump në një konferencë të jashtëzakonshme u shpreh se nga verifikimet e bëra asnjë ushtar amerikan nuk ishte lënduar dhe se për këtë lëvizje të gabuar të Iranit do të vendoste sanksione të forta ekonomike, duke kërkuar më tej ndërhyrjen e NATO-s dhe partnerëve të tjerë.
Ndërkohë, lideri suprem iranian, ajatollahu Ali Khamenei deklaroi se sulmi ishte një “shuplakë në fytyrë” për Shtetet e Bashkuara dhe bëri thirrje që t’i jepet fund pranisë amerikane në Lindjen e Mesme.
Por në mesazhin e tij ajatollahu Ali Khamenei nuk ka lënë pa përmendur edhe vendin tonë:
“Në një vend evropian, në një vend shumë të vogël evropian, por shumë i lig, ka disa elementë amerikanë me disa tradhtarë iranianë. Ata u bën bashkë për të komplotuar kundër republikës islamike.” – u shpreh ai pa përmendur emrin e Shqipërisë.
Për këtë deklaratë të tërthortë ka pasur një reagim edhe nga presidenti ynë, Ilir Meta, i cili shprehet se Shqipëria do vazhdojë të mbrojë të drejtat e njeriut, si një vend që ka përjetuar pasojat e diktaturës:
“Raketat e lëshuara nga Irani drejt dy bazave ushtarake irakiane që strehojnë ushtarakë amerikanë dhe personel të koalicionit, janë një veprim provokues me pasoja të rrezikshme për rajonin dhe stabilitetin e tij. Irani duhet të respektojë marrëveshjet ndërkombëtare, ligjet ndërkombëtare dhe detyrimet e tyre në interes të paqes.
Shqipëria nuk është një vend djallëzor, por një vend demokratik që ka vuajtur nga një diktaturë djallëzore e pashembullt, ndaj të drejtat e njeriut i ka të shenjta.
Prej dy dekadash Shqipëria mbetet e vendosur në angazhimet e saj përkrah SHBA dhe vendeve të NATO-s në luftën kundër terrorizmit ndërkombëtar dhe çdo akti që vë në rrezik stabilitetin dhe paqen në botë.”
Në qytetin e ashtuquajtur Ashraf 3, në Manëz të Durrës strehohen rreth 3000 muxhahedinë, të cilët janë konsideruar edhe opozita në mërgim e Iranit. Ata janë pranuar nga shteti shqiptar pas nënshkrimit të një marrëveshjeje mes qeverisë shqiptare dhe Shteteve të Bashkuara të Amerikës.
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.