Një vit në sirtarët e Kuvendit! – Nis shqyrtimi i ligjit të ri “Për Shtetësinë”, lehtësi për shqiptarët me banim jashtë vendit

Pas një periudhe pritjeje prej rreth një viti nëpër sirtarë, Kuvendi ka futur në axhendën e punës ligjin e ri “Për Shtetësinë. Drafti është depozituar në Kuvend nga qeveria që në gushtin e vitit 2019 dhe synon të sjellë një seri risish në ligjin aktual që është në fuqi që prej vitit 1998.

Hartuesit e draftit nënvizojnë në relacionin shoqërues se ligji actual nuk ofron zgjidhje për rastet e fitimit të shtetësisë në bazë të origjinës, apo të një problematike të vjetër tashme që ka sjellë pamundësinë e regjistrimit në Regjistrin Kombëtar të Gjendjes Civile, të vitit 2010, të personave, të cilët kanë fituar shtetësinë shqiptare (me dekret të Presidentit).

Drafti sjell lehtësimin e procedurave të fitimit të shtetësisë për personat, të cilët kanë hequr dorë nga shtetësia shqiptare dhe kanë fituar një shtetësi të huaj, ndërkohë që në vijim kërkojnë të rimarrin shtetësinë shqiptare, ashtu si dhe për Regjistrimin në RKGJC 2010 i personave mbi 18 vjeç, të cilët kanë lindur jashtë territorit të Republikës së Shqipërisë nga prindër shqiptarë apo qoftë edhe njëri prind shqiptar, por që para kësaj moshe nuk janë regjistruar.

Ndërkaq, drafti sjell Zgjidhje edhe për problematikën e krijuar në praktikë, për paraqitjen e kërkesës për heqje dorë nga shtetësia shqiptare në rast të prindërve të divorcuar. Aktualisht, legjislacioni kërkon që kërkesa duhet të paraqitet nga të dy prindërit, por ky parashikim ka krijuar probleme në rast të mosdakordësisë 2 dhe/ose mosgjetjes së njërit prind.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.