Njerëzit nuk e morën seriozisht / Si sistemi shëndetësor italian u përmbys brenda 24 orëve

Këtë javë, mjekët në Itali janë detyruar të bëjnë një zgjedhje me të cilën askush nuk duhet të përballet: Kush do të jetojë dhe kush do të vdesë?

Ndërsa rastet me koronavirus janë rritur shumë, më shumë se 15,000 njerëz janë infektuar dhe të paktën 1.000 kanë vdekur, punonjësit e kujdesit shëndetësor në vijat e para të betejës janë duke u përballur me një shpërthim të keq të një virusi të ri, një popullsie në plakje dhe mungesë të shtretërve spitalorë .

Mjekët tani po u japin përparësi pacientëve të rinj dhe kryesisht të shëndetshëm COVID-19 sepse shanset e tyre për të mbijetuar eklipsojnë ato të të moshuarve.

Situata tragjike po rikujton zgjedhjet e bëra në një fushë beteje dhe në të vërtetë, Italia tani është në luftë.

Ekspertët vlerësojnë se ishin disa gabime që e sollën Italinë në këtë gjendje, duke filluar nga ato të qytetarëve e mbaruar tek ato të autoriteteve.

Gabimi i parë është se kur fillimisht u përhap lajmi se Italia ishte prekur nga koronavirus, askush nuk e mori seriozisht dhe qytetarët vazhduan jetën e tyre normalisht. Biles edhe qeveria, në frikë e sipër për të marrë masa drastike dhe limituar të drejtat e italianëve, masat i ka marrë shumë gradualisht dhe shumë avash. Ajo do duhej të ishte përgjigjur më shpejt, kur vjen puna në kufizimin e lëvizjes së lirë. Por edhe pasi mori masat drastike, italianët, të pamësuar me kufizime të tilla lirie, nxituan të merrnin trenat dhe makinat për të ikur në jug të Italisë, çka ndikoi në përhapjen e mëtejshme të virusit.

Përveç kësaj, sistemi shëndetësor italian, e në fakt çdo sistem tjetër shëndetësor në botë, nuk ka mjaftueshëm doktorë, për të përballuar një fluks kaq të menjëhershëm pacientësh. Qeveritë me radhë atje kanë shkurtuar fondet ndaj shëndetësisë, duke i lënë ato në 6.8% të PPB. Krahasuar me popullsinë që ka, që është e dyta më e plakur në Evropë, Italia nuk kishte mjaftueshëm mjekë për t’u kujdesur për to.

Tjetër arsye pse statistikat janë kaq të frikshme në Itali është se atje përfaqësuesit e kujdesit mjekësor kanë përzgjedhur të trajtojnë pacientët në moshë më të re, duke lënë në dorë të fatit ata më të moshuar. Kjo pasi, për të njëjtën kurë, të moshuarit kërkojnë më shumë kohë për t’u kuruar, dhe zënë më shumë krevate dhe resurse shëndetësore.

Në Itali, tanimë doktorët nuk ndahen në pediatër, urolog, dermatolog etj, ata të gjithë po përpiqen të trajtojnë të njëjtën sëmundje. Doktor Daniele Macchini, i cili punon në Spitalin Humanitas Gavazzeni në Bergamo, shkruajti një postim në Facebook në fillim të kësaj jave, duke e quajtur koronavirusin një “tsunami që na ka përfshirë të gjithë”. Mendimet e tij, të ndara në italisht, u përkthyen nga Dr. Silvia Stringhini, një epidemiologe në Universitetin e Gjenevës, raportoi New York Post.

“Lufta ka shpërthyer, betejat janë të pandërprera, ditë e natë,” shkroi Macchini.

D/B: SCAN

Burimi: Business Insider

https://www.businessinsider.com/italy-falling-apart-coronavirus-pandemic-doctors-tough-choices-2020-3

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.