Njeriu më i pasur i Azisë dhuron 8% të pasurisë – Gautam Adani jep 7.7 miliardë dollarë për bamirësi në 60-vjetorin e tij

Manjati industrial indian Gautam Adani dhe familja e tij janë zotuar të dhurojnë 600 miliardë rupi – 7.7 miliardë dollarë – me rastin e 60 vjetorit të biznesmenit.

Adani është personi më i pasur i Azisë me një pasuri neto prej 92.7 miliardë dollarësh sipas Indeksit të Miliarderëve të Bloomberg.

Miliarderi është themeluesi i konglomeratit Adani Group. Ai bëri të ditur me anë të një postimi në Tuitter se donacioni do të shkojë kryesisht për kujdesin shëndetësor, arsimin dhe zhvillimin të aftësive për të ndihmuar në ndërtimin e “një Indie të barabartë dhe të gatshme për të ardhmen”. Fondet do të shkojnë për Fondacionin Adani, president i të cilit është vetë ai.

I themeluar në vitin 1996, Fondacioni Adani fokusohet në programet sociale në Indi. Ai ka ndihmuar më shumë se 3.7 milionë njerëz në 2.410 fshatra në vend, sipas të dhënave të publikuara në faqen e internetit të fondacionit.

Adani është ngjitur më shumë se kushdo tjetër në renditjen e miliarderëve të Bloomberg këtë vit, pasi pasuria e tij neto është rritur 16.2 miliardë dollarë si rezultat i rritjes së aksioneve të kompanive të tij si Adani Green Energy, e cila është rritur me rreth 38% në vlerë këtë vit.

Ai i bashkohet njerëzve si Uarren Buffett dhe Bill Gates në premtimin e një pjese të pasurisë së tij për qëllime filantropike.

Adani është një miliarder që e ka krijuar nga zero pasurinë e tij. Ai u largua nga kolegji për të punuar si përpunues diamanti në vitin 1980 dhe filloi të importonte dhe eksportonte mallra të tjera në 1988. Më pas ai u zgjerua gradualisht në industri të tjera duke përdorur kredi, sipas raportimeve të Financial Times.

Adani i ka mbijetuar dy momenteve kritike gjatë jetës së tij.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.