Norma e papunësisë në Kinë – Treguesi zyrtar qëndron poshtë 4%, për dy tremujorë radhazi

Norma e papunësisë në zonat urbane të Kinës ka qëndruar poshtë 4%-shit për të dytin tremujor radhazi, ndërkohë që ekonomia e dytë më e madhe në botë ka mbajtur trajektoren e fortë të rritjes në gjysmën e parë 2017.

Norma ra në 3.95% në fund të Qershorit, krahasuar me rreth 4% në fund të muajit Mars, raporton Ministria e Burimeve Njerëzore dhe Sigurisë Sociale.

Treguesi zyrtar i papunësisë ka qenë për herë të fundit poshtë nivelit prej 4% në vitin 2001. Papunësia e personave të regjistruar në zonat urbane përjashton 280 milionë punëtorë emigrantë të vendit.

Ekonomia u rrit me një normë më të madhe se ç’pritej për tremujorin e dytë, në 6.9%, prej eksporteve më të mëdha dhe prodhimit të fuqishëm, duke bërë që Kina të jetë brenda objektivit të rritjes së Qeverisë  për 2017-ën.

Analistët thonë se tregu i punës do të përkeqësohet në vitet që vijnë, ndërkohë që ekonomia ngadalësohet prej tërheqjes së stimujve monetarë.

Kryeministri Li Keqiang tha se Kina ka shtuar 13.14 milionë vende pune në zonat urbane në 2016-ën dhe synon të shtojë 11 milionë të tjera këtë vit, duke e mbajtur normën e papunësisë poshtë 4.5%. Sipas ministrisë, 7.35 milionë vende të reja pune janë krijuar në gjysmën e parë të këtij viti.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.