“Normalizimi” i investimeve – Prekin nivelin më të ulët në pesë vjet
Investimet private në ekonomi zbritën në nivelin më të ulët të pesë viteve të fundit. Në terma realë, investimet vitin e kaluar kishin vlerën e 18.6% të Prodhimit të Brendshëm Bruto, nga 19.4% që kishin qenë në vitin 2017.
Sipas statistikave të Fondit Monetar Ndërkombëtar, investimet private arritën pikun në vitin 2014, kur shënuan një vlerë sa 21.7% e PBB-së. Në vitet në vazhdim, vlera e tyre kundrejt prodhimit kombëtar ka rënë.
Kjo trajektore lidhet sidomos me ecurinë e investimeve të huaja direkte dhe kryesisht projektet e mëdha energjetike.
Përfundimi i tyre e ka ulur kontributin e investimeve në ekonomi dhe projeksionet janë për një rënie të lehtë edhe gjatë dy viteve të ardhshme. FMN parashikon që për këtë vit investimet private të bien në 18.4%, ndërsa vitin e ardhshëm në 18.3%.
Ndërkohë, ecuria e investimeve publike është më e qëndrueshme. Ato arritën në 5.5% të PBB-së në vitin 2017 dhe qëndruan në këtë nivel edhe për vitin e kaluar. FMN nuk pret luhatje të mëdha të tyre edhe për dy vitet në vazhdim.
Rënia e investimeve, kryesisht atyre të huaja, është faktori kryesor që pritet sjellë një rritje më të ulët ekonomike për këtë vit dhe në të ardhshmin.
Në fakt, një frenim i rritjes pritej qysh për vitin 2018, por prodhimi i lartë i energjisë dhe zgjerimi i turizmit bënë që ekonomia të rritet me rreth 4.2%, norma më e lartë në një dekadë.
Në mungesë të surprizave të ngjashme, pritet që rritja ekonomike e Shqipërisë për këtë vit të zbresë poshtë nivelit 4%.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.