Normat e interesit, edhe obligacionet me rënie të lehtë
Stabilizimi i interesave të borxhit qeveritar po shtrihet edhe në titujt afatgjatë. Në ankandin e obligacioneve dyvjeçare, të zhvilluar këtë javë, kuponi apo interesi mesatar i obligacioneve, ra në 3.35%, nga 3.8% që kishte qenë në ankandin e mëparshëm.
Një tendencë korrektuese drejt rënies së interesave po verifikohet prej disa javësh edhe në ankandet e bonove të thesarit. Arsyeja kryesore është një ndryshim i ndjeshëm në raportet mes kërkesës dhe ofertës në treg.
Në ankandin e të mërkurës, nga 5 miliardë lekë obligacione të shpallura nga Ministria e Financave, kërkesa e paraqitura në ankand arritën në afro 10 miliardë lekë.
Kërkesa e tregut për instrumente të borxhit qeveritar është rritur ndjeshëm në muajt e parë të këtij viti, ndërkohë që në tremujorin e parë të vitit të kaluar u vërejt një rënie e ndjeshme, aq sa në shumicën e ankandeve qeveria nuk arriti të siguronte të gjithë financimin e planifikuar.
Ajo që po ndodh në dy muajt e parë të vitit 2017 është një rritje e ndjeshme e sasisë së fondeve që sistemi financiar po përpiqet t’i investojë në letra borxhi të qeverisë.
Në mungesë të statistikave më të reja lidhur me ecurinë e depozitave dhe kredisë bankare, një analizë e saktë e faktorëve është e vështirë. Megjithatë, në thelb besohet se tregu ka më shumë likuiditete të lira.
Kjo mund të lidhet me një ecuri më të ngadaltë të kreditimit në muajt e parë të vitit apo edhe me çlirim të fondeve që ishin investuar në kredi apo aktive të tjera të maturuara.
Rritja e interesit për të investuar në titujt qeveritarë është mbështetur edhe nga përmirësimi i normave të interesit, pasi ato kishin prekur fundin në mesin e vitit të kaluar.
Pavarësisht nga arsyet, ecuria e tregut primar të borxhit të qeverisë konfirmon parashikimet e ekspertëve se rritja e interesave do të ishte e kufizuar, në formën e një korrigjimi nga vlerat tejet të ulëta, të prekura në vitin 2016.
Frenimi në interesat e bonove dhe obligacioneve do të ulë presionet për rritjen e interesave të depozitave dhe të kredive. Megjithatë, në një perspektivë afatgjatë, ndoshta duke filluar nga viti i ardhshëm, normat e interesit do të nisin një cikël të rritjes graduale, duke ndjekur edhe rimëkëmbjen e ekonomisë.
Ersuin Shehu/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.