Novavax merr autorizimin e parë të vaksinës – Kreu i kompanisë pret të tjera brenda javëve. Ka aplikuar tek EMA dhe FDA
Novavax pret që rregullatorët në Indi, Filipine dhe në vende të tjera, të marrin një vendim mbi vaksinën kandidat të Covid-19 brenda disa javësh, sipas ekzekutivit ë kompanisë për Reuters, pasi vaksina mori autorizimin e parë për përdorim emergjent në Indonezi ditën e Hënë. Aksionet e Novavax u rritën me 13% pasi kompania theksoi gjithashtu se ka aplikuar për përdorim emegjent në Kanada dhe tek Agjencia Europiane e Barnave.
Për Indonezinë, vaksina do prodhohet nga kompania më e madhe në botë e vaksinave, Instituti i Serumit në Indi, dhe do të shitet nën emrin indian Covovax. Firma bëri të ditur se dërgesat drejt Indonezisë pritet të nisin menjëherë. OBSH po rishikon gjithashtu aplikimin rregullator të Novavax dhe prodhuesi amerikan i barnave pret që rishikimi të përfundojë në javët e ardhshme, sipas ekzekutivit Stanley Erck.
Drita e gjebër nga OBSH do të mundësojë nisjen e dozave drejt programit Covax, që furnizon vendet e varfëra. “Besoj se do dërgojmë disa doza tek Covax këtë vit. Por mendoj që Novavax do të mudn të dërgojë sasi të mëdha tek Covax në tremujorin e parë 2022”- tha ekzekutivi i kompanisë. Ai shtoi se Novavax ka zgjidhur të gjithë sfidat e manifakturës dhe ndodhet në dialog me rregullatorët në SHBA, ku pret një përgjigje brenda javëve të ardhshme.
Novavax ka aplikuar deri më tani për autorizim për përdorim emergjent në shumë vende, përfshirë Britani, Australi, Indi dhe Filipine. Vaksina e kompanisë ka rezultuar mbi 90% efektive, përfshirë ndaj disa varianteve shqetësues, në provat e fazës së tretë në SHBA.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.