“Nuk gjen qetësi Kushtetuesja”/ Xhaferrllari të mërkurën përpara Kolegjit të Posaçëm të Apelimit
Sapo humbi një prej anëtarëve të saj, një tjetër gjyqtare e Gjykatës Kushtetuese do të përballet këtë javë me Kolegjin e Posaçëm të Apelimit, shkalla e dytë e Vettting-ut.
Të mërkurën, më datë 27 nëntor është radha e Marsida Xhaferllarit, gjyqtares së sapodekretuar nga Presidenti i Republikës t’i rikthehet betejës me Vetting-un.
Në seancën e parë në dhomë këshillimi në Kolegjin e Apelimit, Gjyqtarja e Kushtetueses do të kërkojë zhbërjen e vendimit të shkallës së Parë të Vetting-ut, e cila ndërpreu procedurën e rivlerësimit ndaj Xhaferllari me arsyetimin se ajo nuk e gëzon statusin e gjyqtarit.
Komiesioni i Pavarur i Kualifikimit vendosi t’i ndërpesë në fillim të këtij viti procedurat e Vetting-ut ndaj Xhaferallarit nën argumentin se ajo ka punuar më shumë se 3 vite si juriste jashtë sistemit gjyqësor, shkak për të cilin nuk mund të gëzojë statusin e magjistratit. Vendim të cilin Xhaferllari e kundërshtoi si të padrejtë dhe e ankimoi në Kolegjin e Posaçëm të Apelimit.
Xhaferllari e fitoi postin në Gjykatën Kushtetuese pak ditë më parë pas një përplasjeje të ashpër me Presidencës dhe Këshillit të Emërimeve në Drejtësi.
Presidenti vendosi të dekretojë Xhaferllarin në Gjykatën Kushtetuese, duke skualifikuar për shkelje proceduriale nga ana e KED-së kolegen e saj Arta Vorpsi.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.