Nuk ka shtyrje të taksës së pronës – Haxhimali: Bashkitë kanë nisur llogaritjen, disa fatura bashkë
Bashkitë nuk janë në periudhë tranzitore sa i përket aplikimit të metodologjisë së re për llogaritjen e taksës së pronës. Në një intervistë për TV SCAN, Drejtori Ekzekutiv i Shoqatës së Bashkive të Shqipërisë, Agron Haxhimali, thekson se bashkitë po punojnë dhe po llogarisin taksën sipas ligjit dhe vendimit të qeverisë me metodologjinë e përcaktuar.
Sipas tij, deklarata e ministrit të Financave dhe Ekonomisë, Arben Ahmetaj është keqkuptim pasi nuk ka hapësira që bashkitë ta shtyjnë aplikimin e kësaj takse.
Haxhimali ka sqaruar gjithashtu se si do të operojnë bashkitë në faturim, pavarësisht se qytetarëve këtë muaj mund tu ketë shkuar fatura me skemën e vjetër.
Nga ana tjetër, një javë më parë, edhe Drejtori i Financave Vendore pranë Ministrisë së Financave dhe Ekonomisë, qartësoi se nga 1 Prilli nuk ka tërheqje pas, dhe bashkitë do të aplikojnë përllogaritjen e re të taksës së ndërtesës.
Metodologjia e re për llogaritjen e taksës së ndërtesës ka hyr në fuqi më 1 Prill, edhe pse nuk ishte gati kadastra fiskale.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.