“Nuk mund të legalizojmë hapësirat e përbashkëta”, Rama në Libofshë: Në një çerek shekulli, 80 mln euro për pronat
Në një çerek shekulli çështja e pronave Shqipërisë i ka kushtuar plotë 80 milionë euro. Kryeministri Edi Rama gjatë ndarjes së certifikatave të pronësisë në Libofshë deklaroi se reforma e pronës do të zgjidhë përfundimisht këtë problem të tejzgjatur.
“Në një çerek shekulli janë shpenzuar për pronat 80 milionë euro. Ende sot janë rreth gjysmë milion subjekte të pa regjistruara. Tani jemi në fazën e zbatimit të reformës së pronës. Ka situata nga më të ndryshme të pronave që ligji i ri i adreson të gjitha. Ne themi atë që bëjmë, dhe bëjmë atë që themi. Brenda 6 mujorit të 2019 do të kemi një adresë të re dhe një qasje të re, pas një kohë të gjatë të problemit të pronave”.
Kreu i qeverisë u ndal edhe te konflikti prej disa ditësh me banorët e Astirit që preken projekti i Unazës së Madhe. Rama nënvizojë që nuk mund të legalizohen hapësirat e përbashkëta.
“Ju jeni në dijeni ose e ndiqni atë konfliktin që është ndezur në mënyrë artificiale për qëllime mirëfilli politike në Tiranë tek Unaza e Re, nuk mund ti shmangemi edhe asaj. Procesi i legalizimit është mbyllur, por ka godina që ligji i ndalon të legalizohen. Është e pamundur të ndërhyjmë në ligj për të legalizuar pushtimin e ish-stacionit që i takon gjithë komunitetit, për të legalizuar pushtimin e një kopshti apo një çerdheje që duhet t’i kthehet komunitetit. Nga ana tjetër ka mirëkuptim për këta njerëz, kthimi i këtyre pronave të publiku do të behet në bazë projekteve por edhe me një trajtim njerëzor për këta njerëz që preken.
Qeveria ka vendosur bonusin e qirasë. aty ku ke zëne hapësirën e përbashkët, apo aty ku kalon rruga, projekti, shkolla apo çerdhja, nuk mund të legalizojmë pronën. Nuk e bën dot shteti të të legalizojë për të të dhënë para sikur të ishe pronar, sepse i bie që gjithë populli që paguan taksa të punojë për të kaluar vite të tera duke paguar ata të cilët janë të palegalizueshëm. Por ama kur bëhet fjalë për shtëpi, ka një përgjegjësi”.
Në Libofshë ka përfunduar procesi i legalizimeve.
“Në Libofshë në 8 vitet e shkuara qeveria e asaj kohe ka bërë vetëm 72 legalizime, pjesa më e madhe biznese e lokale. Ndërsa ne kemi bërë 8320 legalizime në 4 vite. 94 për qind e legalizimeve në këtë zonë janë në tokën e tyre. Familje që nuk kanë shkuar në tokën e tjetrit. Kanë ndërtuar banesa në tokën e tyre. Nga 2006-2013 asnjë godinë e legalizuar. Të paktën të kishën legalizuar një kishë apo xhami”.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.