Nuk ndalen kërkesat për hidrocentrale – Ja zonat ku do ndërtohen HEC-et “Mushta” dhe “Shulleri”

Investimet në ndërtimin e hidrocentraleve të vegjël sa vijnë e rriten. Kjo vihet re nga kërkesat e dorëzuara pranë Ministrisë së Infrastrukturës dhe Energjisë, ku vetëm në dy javët e para të këtij muaji janë paraqitur disa aplikime për miratimin e këtyre veprave hidroenergjitike.

Kështu, qarku i Korçës vijon të mbetet në fokus të investitorëve ndërtimin e impianteve të prodhimit të energjisë nga burimet ujore. MIE njofton se një tjetër aplikues, shoqëria ‘Thoreneks’ sh.p.k  ka shprehur interesin për të ndërtuar një hidrocentral të vogël (Shulleri) në përroin e Shullerit, rrjedha e sipërme e lumit Shkumbin.

Shoqëria ka si objekt të aktiviteti të saj prodhim dhe tregtim betoni dhe parafabrikatesh për ndërtim objektesh.

Ndërkohë, një vepër e tillë hidroenergjitike është parashikuar të ndërtohet edhe në qarkun e Shkodrës. Kësaj radhe, shoqëria ‘Gjeo-A’ sh.p.k që ushtron veprimtarinë në prodhimin e energjisë nga burimet e rinovueshme ka aplikuar për miratimin e HEC-it ‘Mushta’. Pas miratimit, ky i fundit pritet të ndërtohet në përroin me të njëjtin emër, degë lumit Fan i Madh, në Bashkinë Pukë.

Kapaciteti i instaluar i impianteve parashikohet të jetë deri në 2MW, ndërsa nuk bëhet ende e ditur vlera i investimeve.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.