Nuk plotësonin standardet, mbyllen 28 thertore – AKU: Lista e subjekteve të mbyllura në çdo qark. Ndalohen dy inspektorë në Tiranë
Pas paralajmërimit të kryeministrit bërë ditë më parë për mbylljen e thertoreve jashtë standardit, puna në terren nga ana e AKU duket se tashmë ka nisur.
Nisma e Autoritetit Kombëtar të Ushqimit e tre ditëve të fundit, në lidhje me kushtet e therjes së kafshëve dhe tregtimit të mishit ka çuar në mbylljen e 28 pikave të therjes.
Sipas AKU, subjektet e licencuara nuk plotësonin kushtet higjieno-sanitare dhe detyrimet tjera të parashikuara në ligj.
“Prej tre ditësh, drejtoritë rajonale kanë përqendruar punën e tyre në kontrollin e pikave të therjes, si dhe njësitë e tregtimit të mishit. Si rezultat, nga 29 inspektime të kryera për këtë qëllim. Janë mbyllur 28 pika therjeje në të gjithë vendin, ndërsa për një subjekt është lënë detyra për plotësimin e disa kushteve. Të gjitha rastet e mësipërme të cilat janë mbyllur nuk garantojnë as minimumin e standardeve të parashikuara me ligj.
Në Tiranë janë mbyllur tri pika therjeje, një punishte qoftesh dhe një pikë e tregtimit të mishit, si dhe një është paralajmëruar, 4 pika therjeje në Qarkun Gjirokastër, dy në Berat, dy në Dibër, 1 në Qarkun Elbasan dhe një subjekt është paralajmëruar, 4 në Qarkun Fier, 1 në Qarkun Lezhë, 1 në Qarkun Kukës, 1 në Shkodër, dhe 4 janë mbyllur nga Drejtoria Rajonale e Qarkut Vlorë etj”.
Ndërkohë dy inspektorët të Drejtorisë Rajonale të AKU Tiranë u vunë në pranga pas denoncimit të Drejtorisë së Përgjithshme të AKU, për abuzim me detyrën dhe shkelje të ligjit, pasi kishin licencuar një pikë therjeje në fshatin Baldushk, e cila nuk plotësonte asnjë kriter ligjor.
“Autoriteti Kombëtar i Ushqimit garanton se ky nuk është një aksion por një pune e filluar, e cila përfundon vetëm me reformimin e plotë të gjithë zinxhirit të sigurisë ushqimore në vend, çdo tentativë për të rihapur aktivitetet e mbyllura do të ndëshkohet maksimalisht, ndërsa kujton se në sitën e tij do të jenë të gjitha thertoret dhe njësitë e tjera të tregtimit të mishit.
Ministria e Bujqësisë dhe Zhvillimit Rural dhe AKU zotohen se do t’i japin prestigjin e munguar të gjithë inspektorëve të sigurisë ushqimore në vend, të cilët respektojnë ligjin dhe do të çojnë përpara drejtësisë çdo rast abuzimi apo korrupsioni”, thuhet në njoftimin e AKU.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.