Numrat e emigrantëve në Shqipëri – Ndër 3 shtetet më pak të preferuara në Europë dhe me një rekord

Në Shqipëri ka vetëm 52 mijë emigrantë, thotë një raport i fundit i Kombeve të Bashkuara mbi emigrantët nëpër botë.

Të dhënat i referohen vitit aktual dhe tregojnë gjithashtu se, nga viti 2000, numri i emigrantëve në vendin tonë ka rënë ndjeshëm, pasi 17 vite më parë numëroheshin 77 mijë emigrantë në Shqipëri, ose 2.5% e popullsisë së përgjithshme. Sot, kjo normë ka rënë në vetëm 1.8%.

Në Europë vetëm Bosnje Hercegovina dhe Polonia kanë një përqindje më të vogël të emigrantëve në raport me popullsinë se sa vendi ynë.

Por ndërkohë që Polonia i ka shpallur luftë haptazi emigracionit, Bosnje Hercegovina është një vend me probleme të theksuara edhe sot, mbi 20 vite pas luftës si dhe me përplasje të vazhdueshme etnike.

Por, vendi ynë mban edhe një tjetër rekord, tregojnë këto të dhëna. Në Shqipëri mosha mediane e emigrantëve është më e ulta në të gjithë kontinentin, në vetëm 19.7 vjeç.

Në botë ndërkohë, mosha mediane e emigrantëve në Shqipëri është e dyta më e vogël pas Meksikës. Kjo e bën vendin tonë një rast mjaft të rrallë në këtë drejtim.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.