Numri i lindjeve në Shqipëri në rënie – Gjirokastra, qarku me numrin më të ulët
Numri i lindjeve në Shqipëri vazhdon të ulet. Nga të dhënat e Institutit të Statistikave, edhe gjatë tremujorit të tretë të vitit 2017 numri i lindjeve ka shënuar një rënie me 20.7 për qind krahasuar me po të njëjtën periudhë të një viti më parë. Sipas INSTAT, gjatë kësaj periudhë janë shënuar 7203 lindje.
Ndërkohë, sipas të dhënave numri i vdekjeve për këtë tremujor rezulton 4853, duke shënuar kështu një rritje në krahasim me T3 2016.
Numri i lindjeve tejkaloi atë të vdekjeve me 2 350 gjatë kësaj periudhe. Shtesa natyrore e popullsisë paraqet një rënie me 46.7 për qind. Vlera më e lartë nga 12 qarqet e Shqipërisë është regjistruar në qarkun e Tiranës, ku numri i lindjeve tejkaloi me 1 068 numrin e vdekje, pasuar nga qarku i Durrësit dhe Elbasanit. Qarku i Gjirokastrës, Korçës dhe Vlorës janë edhe qarqet me vlerën më të ulët sa i takon shtesave natyrore, raporton SCAN.
Lidhur me numrin e lindjeve, kryeson qarku i Tiranës me 2 271 lindje, që krahasuar me po të njëjtën periudhë të vitit të kaluar, ka shënuar një rënie me 18.5 për qind. Ndërsa në qarkun e Gjirokastrës është shënuar edhe numri më i ulët i lindjeve në 112 të tilla, duke shënuar një rënie të konsiderueshme me 42.3 për qind, në krahasim me T3 2016, pasuar nga qarku i Vlorës me 32.6 për qind.
Sa i takon numrit të vdekjeve, qarku i Tiranës mban edhe numrin më të lartë të me 1 203 vdekje, duke shënuar një rritje me 7.8 për qind në krahasim me T3 2016. Ndërkohë, numri më i ulët i vdekjeve regjistrohet në qarkun e Kukësit me 118 vdekje, duke shënuar një rritje në krahasuar me po të njëjtën periudhë të një viti më parë.
Ndërkohë, qarqet e tjera ku është shënuar një rënie e madhe e numrit të vdekjeve janë ai i Gjirokastrës, ndjekur nga qarku i Vlorës, Lezhës, Durrësit dhe Korçës.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.