Qeveria gjermane 10.5 mln Euro për nxitjen e punësimit dhe formimit profesional – Nënshkruhet marrëveshja mes institucioneve

Nënshkruhet marrëveshja për zbatimin e programit “Zhvillimi i qëndrueshëm ekonomik dhe rajonal, nxitja e punësimit, arsimit dhe formimit profesional.” Marrëveshja për bashkëpunimin teknik nga pala shqiptare është nënshkruar nga tre institucionet: Këshilli i Ministrave, MZHETTS dhe MMSR.

Për zbatimin e këtij programi, Qeveria e Republikës Federale të Gjermanisë do të japë rreth 10.5 milionë Euro, ndërkohë programi ka kohëzgjatje nga vitet 2017-2020.

Sipas një njoftimi të fundit të MZHETTS, projekti do të organizohet në tre fusha kryesore të ndërhyrjes:

-Zhvillimi i Sektorit Privat. Në këtë shtyllë të programit, në fokus do të jetë mbështetja për sipërmarrjet dhe “Start-Up”. Ndërmarrjet mikro, të vogla dhe të mesme do të mbështeten nga programi për t’u zhvilluar sipas modeleve dhe praktikave të suksesshme gjermane. Përveç kësaj, do të mbështeten projekte investimesh me ndikim rajonal dhe do të ofrohen shërbime këshillimore për politikat rajonale te zhvillimit të sipërmarrjes.

-Arsimi dhe Aftësimi Profesional. Programi do të mbështesë disa Qendra të Formimit Profesional në rajone të ndryshme të vendit. Programi gjithashtu do të synojë afrimin e sektorit privat me arsimin dhe formimin profesional me qëllim përshtatjen e arsimit dhe formimit profesional me kërkesat e tregut të punës.

-Programi do të ofrojë mundësi për mbështetjen e Iniciativave sociale për grupe të disavantazhuara nëpërmjet OJQ-ve lokale.

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.