NYT/ Deutsche Bank përballet me hetimin për neglizhencë të mundshme të pastrimit të parave
Autoritetet federale të SH.B.A.-së po hetojnë nëse Deutsche Bank AG ka respektuar ligjet që synonin të ndalonin pastrimin e parave dhe krime të tjera, njoftoi të mërkurën New York Times. Aksionet e bankës më të madhe të Gjermanisë ranë men 0.5% të enjten pas raportit të New York Times, i cili citonte plot shtatë persona që ishin të përfshirë në këtë çështje.
Zëdhënësi i Deutsche Bank nuk pranoi të komentojë mbi raportin e Times, por tha se: “Ne mbetemi të angazhuar për të bashkëpunuar me hetimet e autorizuara.” Hetimi përfshin një rishikim të trajtimit të raporteve të aktiviteteve të dyshimta nga ana e bankës gjermane, të përgatitura nga punonjësit e saj lidhur me transaksionet potencialisht problematike, duke përfshirë disa që janë të lidhura edhe me dhëndrin e Donald Trump dhe këshilltarin kryesor Jared Kushner, sipas Times .
Raporti i Times, thotë se hetimi ndaj Deutsche Bank është një element i disa kontrolleve të ndara por mbivendosëse të qeverisë mbi mënyrën se si fonde të paligjshme kanë hyrë përmes sistemit financiar të SHBA dhe disa banka të tjera po hetohen gjithashtu. Në fillim të këtij muaji, një grup i demokratëve të senatit amerikan i kërkoi Rezervës Federale të hetojë marrëdhënien e Deutsche Bank me Trump dhe Kushner.
Burimi: NYT
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.