Obligacione të vaksinave ndaj Covid-19, Gavi: “Shpërndarja e vaksinave në vendet e varfëra do jetë e kushtueshme”
Investitorët e titujve të borxhit do të marrin pjesë në një valë të obligacioneve të vaksinave, që pritet të ofrojnë miliarda dollarë për shpërndarjen e shpejtë të vaksinave në vendet në zhvillim. Obligacionet e vaksinave janë emetuar edhe më parë, por nevojat urgjente të financimit pritet të sjellin sasi të mëdha të emetimeve kësaj here. Kosto totale e imunizimit të botës në zhvillim është e vështirë për t’u matur dhe pritet të arrijë në dhjetëra miliarda dollarë.
Aleanca e vaksinës GAVI deklaroi javën e kaluar se iniciativa me OBSH për të blerë dhe shpërndarë vaksinat në 92 vende të varfëra kërkon thuajse 5 miliardë dollarë, për 1.3 miliardë doza. Kjo shifër, shtuar 2.1 miliardë dollarë që është siguruar deri më tani, mund të jetë e nënvlerësuar nëse kosto për dozë rezulton më e lartë. Cyrus Ardalan, Shefi i Njësisë Ndërkombëtare të Financimit për Imunizim, që gjeneron fonde për GAVI, vlerëson se 25-50% të nevojave për financim do të përmbushen me obligacionet.
GAVI, me seli në Gjenevë, ka siguruar qindra miliona doza të vaksinës kandidat të AstraZeneca, që nuk ka marrë ende miratim. Aleanca synon të paguajë për të paktën 1 miliardë dozat e para dhe ka për objektiv 20% të popullsisë në vendet e varfëra. Organizatat ndërkombëtare vlerësojnë se vaksinimi i 20% të Amerikës Latine dhe Karaibeve, mund të kushtojë mbi 2 miliardë dollarë, ndërsa shpërndarja tek grupet me prioritet në Afrikë, mund të arrijë në 6 miliardë dollarë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.