Obligacionet 2-vjeçare – Kërkesë në ulje, kuponi rritet në 2.64%

Interesat e obligacioneve 2-vjeçare të qeverisë shqiptare u rritën sërish në ankandin e muajit korrik. Sipas të dhënave nga Banka e Shqipërisë, kuponi i obligacioneve, u rrit në 2.64%, nga 2.55% që kishte qenë në ankandin e qershorit.

Nga 4.5 miliardë lekë obligacione të shpallura nga Ministria e Financave, kërkesat e paraqitura në ankand u frenuan në vlerën e 3.75 miliardë lekëve.

Në tre muajt e fundit, duket se kërkesa e tregut për instrumentet qeveritare, sidomos ato afatgjata, është disi më e ulët. Kjo po sjell një rritje të interesave, gjithsesi në përmasa të kufizuara.

Në gjysmën e parë të këtij viti, qeveria shqiptare ka vijuar në strategjinë e zgjatjes së maturitetit mesatar të borxhit të brendshëm, duke zëvendësuar gradualisht huamarrjen afatshkurtër me atë afatgjatë. Kjo ka sjellë një ofertë më të lartë të obligacioneve në tregun financiar, me pasojë edhe një rritje të lehtë të interesave.

Në total, huamarrja e re e qeverisë në tregun e brendshëm për gjashtë muajt e parë të vitit ka qenë rreth 14 miliardë lekë, shifër kjo pothuajse e njëjtë me të njëjtën periudhë të vitit të kaluar.

Edhe për shkak të tendencës konsoliduese të deficitit dhe borxhit, tregu primar i titujve të qeverisë paraqitet më i stabilizuar, çka reflekton një gjendje relativisht të balancuar mes ofertës dhe kërkesës së letrave të borxhit qeveritar.

Përtej luhatjeve modeste, ekspertët presin që interesat të qëndrojnë të ulëta edhe gjatë këtij viti, në ndjekje të politikës monetare lehtësuese.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.