Obligacionet në euro – Qeveria synon të përfitojë nga oferta e lartë

Qeveria shqiptare do të organizojë të enjten ankandin e radhës të obligacioneve në euro. Në ankand do të ofrohen për shitje obligacione dyvjeçare në vlerën e 45 milionë eurove, me një kupon indikativ 0.7%.

Huamarrja në euro në tregun e brendshëm financiar është bërë e zakonshme gjatë viteve të fundit, sidomos në sezonin veror. Qeveria kërkon të shfrytëzojë shtimin e likuiditeteve të lira në euro gjatë kësaj periudhe, për të siguruar financime me norma më të ulëta interesi.

Siç dihet, tregu i brendshëm që nga viti i kaluar karakterizohet nga një ofertë e lartë e euros, çka ka sjellë edhe zhvlerësim të monedhës europiane në kursin e këmbimit me lekun.

Rritja e ofertë së valutës është shoqëruar edhe me një rritje e ndjeshme e depozitave bankare në euro, ndërsa nga ana tjetër kreditimi në monedhën europiane paraqitet në rënie.

Për bankat, investimi i fondeve të lira në euro është kthyer në një problem, në kushtet kur interesat e monedhës europiane në tregje janë praktikisht në vlera negative. Në këtë mënyrë, obligacionet qeveritare kanë rezultuar një zgjidhje e mirë për të investuar këtë likuiditet të tepërt.

Investimi i kursimeve në obligacionet qeveritare mund të jetë një alternativë e mirë edhe për individët, duke qenë se kthimet janë disi më të larta krahasuar me interesat e depozitave.

Ankandi i fundit i obligacioneve në euro u organizua më datë 20 janar të këtij viti. Qeveria shiti obligacione për afro 40 milionë euro dhe kuponi ishte 0.8%, normë kjo shumë më e ulët krahasuar me obligacionet 2-vjeçare në lekë, që, në të njëjtën periudhë u emetuan me një kupon prej 3.8%.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.