OBSH bën thirrje për solidaritet – Shkenca dhe mirëkuptimi janë të domosdoshme

Solidariteti që ka treguar bota përballë virusit sars-cov-2 është arsyeja kryesore përse bota sot, dhe sidomos shkenca gjendet përballë diçkaje të pamenduar më parë, duke diskutuar për disa vaksina konkrete, vetëm 8 muaj pas shfaqjes së virusit, nënvizoi zëdhënësja e OBSH në një intervistë të dhënë së fundmi.

Pavarësisht përparimit të madh në zhvillimin e vaksinave COVID-19, vendet ende kanë nevojë për solidaritet për të mposhtur pandeminë, tha Margaret Harris, zëdhënëse e Organizatës Botërore të Shëndetësisë (OBSH). Harris tha se tani jemi në një vend shumë më të mirë falë bashkëpunimit global, i cili ka çuar në përparim të madh në zhvillimin e vaksinave. “Tetë muaj pasi e dinim për herë të parë që ky virus hyri në popullatën njerëzore, ne jemi në një fazë ku po flasim për të pasur disa kandidatë me të vërtetë të mundshëm të vaksinave. Kjo nuk ka ndodhur kurrë në historinë njerëzore, dhe kjo është rezultat i bashkëpunimit fantastik në botën tonë “, shtoi Harris. Ajo vuri gjithashtu në dukje se shkëmbimi i informacionit dhe njohurive të sëmundjes jo vetëm që i ka ndihmuar shkencëtarët të kuptojnë më mirë virusin por gjithashtu u ka mundësuar mjekëve që të sigurojnë trajtim më të mirë për njerëzit e infektuar. “Ne jemi duke mësuar shumë, shumë më tepër për atë që bën virusi në trup, bën në trupin e njerëzve të të gjitha moshave, nga fëmijët e vegjël tek të moshuarit, dhe ne jemi bërë shumë, shumë më të mirë në trajtimin e njerëzve me komplikacione të rënda.  Ajo që na duhet është shkenca, por na duhet solidariteti për të aplikuar shkencën në mënyrë që të gjejmë me të vërtetë zgjidhjet për ta mposhtur këtë virus ”, tha zëdhënësja e OBSH.

Roel Kurti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.