OBSH paralajmërim: “Trajtimi i kancerit, diabetit dhe sëmundjeve jo ngjitëse janë ndërprerë ndjeshëm nëpër botë”

Shërbimet e parandalimit dhe trajtimit të kancerit, sëmundjeve të zemrës, diabetit dhe sëmundjeve të tjera jo ngjitëse janë shkëputur rëndë në tërë globin nga pandemia e Covid-19, ka thënë Organizata Botërore e Shëndetit.

Më shumë se gjysma (53%) e vendeve të anketuara kanë shërbime të shkëputura pjesërisht ose plotësisht për trajtimin e hipertensionit; 49% për trajtimin e diabetit dhe komplikimeve që lidhen me diabet; 42% për trajtimin e kancerit, dhe 31% për emergjencat kardiovaskulare.

Shërbimet e rehabilitimit janë ndërprerë në pothuajse dy të tretat (63%) të vendeve, përkundër rëndësisë së rehabilitimit për një shërim të shëndetshëm pas rasteve të rënda të Covid-19.

Arsyet më të zakonshme për ndërprerjen ose zvogëlimin e shërbimeve ishin anulimet e trajtimeve të planifikuara, një rënie e transportit publik në dispozicion dhe mungesa e stafit sepse punonjësit e shëndetit ishin ri-caktuar për të mbështetur shërbimet Covid-19.

Në një në pesë vende që raportuan ndërprerje, një nga arsyet kryesore për ndërprerjen e shërbimeve ishte mungesa e ilaçeve, diagnostikimit dhe teknologjive të tjera.

Sondazhi i 155 vendeve i kryer për trupin shëndetësor të Kombeve të Bashkuara zbuloi se ndikimi po ndjehej më së shumti në vendet më të varfra.(The Guardian)

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.