OBSH paralajmëron: Omicron po ‘vret njerëz’ dhe nuk duhet të quhet ‘i butë’!
Kreu i Organizatës Botërore të Shëndetësisë (OBSH) paralajmëroi të enjten kundër përshkrimit të variantit Omicron si “i butë” në mes të një “cunami rastesh” që mbizotërojnë në sistemet shëndetësore në të gjithë botën.
Raporti i fundit javor i agjencisë së OKB-së tregoi se një rekord prej 9.5 milionë infeksionesh COVID-19 u raportuan në të gjithë botën gjatë javës së kaluar – një rritje prej 71% në krahasim me periudhën e mëparshme 7-ditore.
Të gjitha rajonet raportuan një rritje të numrit të infeksioneve me rritjen më të madhe (100%) të vërejtur në Amerikë, e ndjekur nga Azia Juglindore (78%) dhe Evropa (65%).
Megjithatë, shefi i OBSH-së theksoi se “ne e dimë, me siguri, se ky është një nënvlerësim i rasteve, sepse numrat e raportuar nuk pasqyrojnë numrin real të testeve gjatë festave, numrin e vetë-testimeve pozitive të pa regjistruara dhe sistemet e ngarkuara të mbikëqyrjes që humbasin rastet në mbarë botën.”
Omicron, i zbuluar për herë të parë në Afrikën e Jugut në nëntor, është fajësuar për valën e fundit. Varianti u caktua “shqetësues” nga OBSH sepse studimet tregojnë se është më i transmetueshëm dhe më rezistent ndaj trajtimit sesa variantet e tjera, duke përfshirë Delta, me njerëzit më të prirur për t’u infektuar ose riinfektuar edhe kur janë të vaksinuar plotësisht.
Javën e kaluar u humbën 41 mijë jetë nga sëmundja – një rritje prej 10% javë pas jave – duke e çuar numrin total të vdekjeve të pandemisë në mbi 5.4 milion vdekje, sipas përditësimit të OBSH-së. Rajoni afrikan është i vetmi, megjithatë, që ka raportuar një rritje javore të vdekjeve të reja (22%) edhe pse Europa kishte numrin më të lartë të vdekjeve me 22,817 vdekje.
Shefi i OBSH-së përsëriti se vaksina mbetet një nga mjetet më efektive kundër pandemisë, por shprehu keqardhjen edhe një herë që aksesi në të gjithë globin është kaq i pabarabartë.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.