OBSH paralajmëron: Vala Omicron në Europë po ‘lëviz drejt lindjes’ duke dyfishuar rastet në disa vende!
Numri i rasteve të COVID-19 është më shumë se dyfishuar në Armeni, Azerbajxhan, Bjellorusi, Gjeorgji, Rusi dhe Ukrainë gjatë javës së kaluar, paralajmëroi të martën zyra europiane e Organizatës Botërore të Shëndetësisë (OBSH).
“Siç pritej, vala Omicron po lëviz drejt lindjes – 10 shtete anëtare lindore e kanë zbuluar tani këtë variant,” tha Dr Hans Kluge, drejtori rajonal i OBSH-së për Europën, në një deklaratë.
Më shumë se 828,000 raste të reja u raportuan në 53 vendet anëtare të OBSH-së në Europë të hënën – duke shkuar nën pragun e një milion për herë të parë që nga 11 janari. Rajoni regjistroi një nivel të lartë pandemik prej më shumë se 2 milionë infeksionesh të reja ditore më 26 janar.
Rusia raportoi një rekord të ri prej më shumë se 197,000 infeksionesh më 10 shkurt me Omicron të fajësuar për 60% të të gjitha rasteve të reja. Vendi është më i godituri në Europë me më shumë se 341,000 viktima.
Kluge theksoi se “vaksinimi mbetet mbrojtja jonë më e mirë kundër sëmundjeve të rënda dhe vdekjes për të gjitha variantet aktuale të virusit COVID-19 që qarkullojnë” dhe se normat në Europën Lindore mbeten të ulëta.
Në Rusi, i cili ishte vendi i parë në botë që filloi një fushatë kombëtare vaksinimi, vetëm rreth gjysma e 146 milionë banorëve janë vaksinuar deri më tani.
Kluge u bëri thirrje “qeverive, autoriteteve shëndetësore dhe partnerëve përkatës që të shqyrtojnë nga afër arsyet lokale që ndikojnë në kërkesën dhe pranimin më të ulët të vaksinave, dhe të krijojnë ndërhyrje të përshtatura për të rritur urgjentisht normat e vaksinimit, bazuar në provat specifike të kontekstit”.
OBSH Europe theksoi gjithashtu se përhapja e variantit të ri po i vë sistemet e kujdesit shëndetësor nën tendosje në rritje, duke paralajmëruar një rritje të numrit të punonjësve të kujdesit shëndetësor që janë të infektuar nga 30,000 në dhjetor në 50,000 në janar.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.