OBSH: Varianti Omicron përhapet më shpejt se Delta. Vaksinat mund të jenë më pak efektive ndaj tij!
Varianti i sapo zbuluar Omicron i COVID-19 ka të ngjarë të përhapet më shpejt se varianti Delta, vuri në dukje Organizata Botërore e Shëndetësisë (OBSH) në një përmbledhje teknike, duke shtuar se vaksinat mund të jenë më pak efektive kundër tij.
Ajo shtoi se kishte disa sugjerime, veçanërisht për shkak të ndryshimeve në proteinën së pikut dhe se vaksinat do të ishin më pak efektive kundër variantit.
Hulumtimi i lëshuar të premten nga Agjencia e Sigurisë Shëndetësore në Mbretërinë e Bashkuar zbuloi se një kurs i plotë vaksinimi me dy doza ishte më pak efektiv kundër sëmundjes simptomatike me Omicron sesa me llojin origjinal të COVID-19 ose variantin Delta.
Megjithatë, ai zbuloi se “efektshmëria e moderuar e vaksinës kundër infeksionit të butë prej 70-75% u pa në periudhën e hershme pas një doze përforcuese”.
Por, OBSH tha se kishte ende të dhëna shumë të kufizuara për efektivitetin e vaksinës për Omicron dhe se sa i rëndë është varianti i ri.
Ndërsa studiuesit e Afrikës së Jugut kanë thënë se ka disa indikacione se Omicron është më pak i rëndë se varianti Delta dhe shumica e rasteve në BE janë të lehta, “mbetet e paqartë se deri në çfarë mase Omicron mund të jetë në thelb më pak virulent,” thuhej në shënimin teknik.
Studiuesit në Mbretërinë e Bashkuar paralajmëruan të shtunën se duhen marrë masa të mëtejshme për të parandaluar transmetimin, duke deklaruar se Omicron mund të bëhet shpejt lloji dominues i COVID-19 në vend dhe të shkaktojë dhjetëra mijëra vdekje shtesë deri në pranverë.
Omicron u identifikua për herë të parë si një variant shqetësimi në fund të nëntorit dhe që atëherë është identifikuar në 63 vende.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.