OECD rrit projeksionet për botën – Ekonomia do të rritet me 3.9%, paralajmëron për luftën tregtare
Organizata për Bashkëpunim dhe Zhvillim Ekonomik ka rritur projeksionet për ekonominë globale në këtë vit edhe tjetrin, por paralajmëroi gjithashtu mbi rrezikun e proteksionizmit tregtar. Organizata projekton një rritje të ekonomisë globale me 3.9% në vitin 2018 dhe 2019, krahasuar me 3.7% që vlerësonte më parë, prej rritjes së investimeve private, fuqizimit të tregtisë dhe përmirësimit të besimit të ekonomive familjare dhe bizneseve.
Megjithatë, Organizata paralajmëroi se kundërpërgjigja e vendeve ndaj tarifave mbi çelikun dhe aluminin të vendosura nga administrata e Trump, mund të dëmtojë këtë performancë. Sipas raportit, ekonomia botërore po rritet tashmë në normën mesatare historike, por këto projeksione janë bazuar në shfrytëzimin e investimeve më të mëdha dhe tregtisë, pa marrë në konsideratë barrierat tregtare.
Sipas Organizatës me seli në Paris, rritja e tarifave mes SHBA dhe partnerëve tregtare, do të zeronte edhe efektin pozitiv të reduktimeve tatimore të Trump në ekonominë e Shteteve të Bashkuara. “Proteksionizmi tregtar qëndron rreziku kryesor që do të ndikojë negativisht besimin, investimet dhe vendet e punës”, shkruhej në raport. Sipas OECD, mënyra më e mirë për të trajtuar mbikapacitetin në tregun e çelikut është ndjekja e rregullave ndërkombëtare, kryesisht ato të themeluara nga Organizata Botërore e Tregtisë.
Ndër rreziqe të tjera, Organizata për Bashkëpunim dhe Zhvillim Ekonomik përmendi edhe cënueshmëritë financiare që mund të vijnë nga rritja e normave të interesit. Sipas raportit, priten korrigjime të tjera në çmimet e aktiveve ndërkohë që normalizohen politikat monetare, për shkak të vlerave të larta në disa tregje, përfshirë tregun e kapitalit në SHBA, tregjet e shtëpive në Kanada dhe Australi si dhe në titujt e borxhit të korporatave.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.