Oferta të papërgjegjshme – APP ndryshon rregullat, operatorët s’do njihen me fondin limit të tenderit
Agjencia e Prokurimit Publik ka ndryshuar rregullat për tenderët me vlerë të vogël, pas konstatimeve një numri të lartë të ofertimeve të papërgjegjshme nga ana e operatorëve ekonomikë.
Sipas APP-së operatorët ekonomikë nuk përllogarisnin ofertat e tyre në bazë të nevojave që autoritetet kontraktore kanë për mallra apo shërbime, por vetëm mbi vlerën e prokurimit.
Kjo praktikë ka sjellë më pas dështime të procedurës për shkak të tërheqjes së përsëritur të operatorëve, të cilët nuk mund të kryenin detyrimet e kontratës për të cilën ishin shpallur fitues.
Referuar udhëzimit të ri, operatorët ekonomikë nuk do të njihen paraprakisht me fondin e përllogaritur nga autoriteti kontraktor, por vetëm me objektin e prokurimit dhe sasinë e kërkuar nga autoriteti.
Ndërkohë që, pavarësisht se fondi limit nuk do të pasqyrohet në urdhrin përkatës së prokurimit, autoriteti kontraktor do të kryejnë përllogaritjen e fondit limit sipas parashikimeve ligjore në fuqi, e cila do t’i shërbejë jo vetëm për të krahasuar ofertat e paraqitura, por edhe për efekt të ruajtjes së vlerës së pasqyruar në regjistrin e parashikimeve të procedurës së tenderimit.
Këto ndryshimeve vijnë pak kohë pasi Komisioni parlamentar i Ekonomisë adresoi kritika të forta mbi transparencën dhe deformimin e konkurrencës së ndershme si pasojë e praktikave korruptive.
I njëjti komision ngriti shqetësimin se aktualisht nuk ka asnjë institucion që kontrollon dhe vlerëson sesi zhvillohen procedurat tenderuese dhe sesi shpenzohen paratë publike.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.