Oferta turistike e Shqipërisë prezantohet në Berlin. Pas këtij panairi, promovimi tjetër në Moskë
Shqipëria po prezanton potencialet e saj turistike në Panairin Ndërkombëtar të Turizmit “ITB BERLIN”, i cili hapi dyert më 8 mars dhe do të mbyllet më 12 mars 2017. Në këtë panair marrin pjesë rreth 187 shtete, dhe afro 6000 përfaqësues të mediave të ndryshme prestigjoze.
Referuar njoftimit të Ministrisë së Zhvillimit Ekonomik, Shqipëria prezantohet këtë vit me një stendë 120 metra katrorë, ku një numër mjaft i konsiderueshëm vizitorësh kanë frekuentuar hapësirën shqiptare në panair, që në ditën e parë.
“Në ditën e parë u realizuan një sërë takimesh të rëndësishme me subjekte dhe personalitete të ndyshme, ku mund të përmendim takimin me Ministrin e Turizmit të Italisë z.Dario Franchescini si dhe Presidentin e Organizatës Botërore të Turizmit z.Taleb Raif, të cilët vlerësuan rolin e Ministrisë së Zhvillimit Ekonomik, Turizmit, Tregtisë dhe Sipërmarrjes për impulset shumë pozitive që po i jep së fundi zhvillimit të Turizmit në Shqipëri. Grupet kryesore të interesit u interesuan mbi mundësitë e organizimit nga ana e vendit tonë të tureve familjarizuese me media dhe operatorë turistike nga vende të tilla si Gjermania, Sllovenia, Zvicra , Polonia, etj. Një vend të rëndësishëm zunë gjatë takimeve të ditës së parë përfaqësuesit e kompanive PR dhe të Marketingut nga vende e tregje të ndryshme, të interesuar për të nxitur turizmin me vendin tonë, si nga Anglia, Gjermania, Finlanda, Kina, Polonia etj” shkruhet në njoftim.
ITB Berlin është panairi i radhës ku Shqipëria po prezantohet këtë vit, duke nisur me Utreht Holandë, CMT Shtutgard, IMTM Izrael, IFT Beograd, Nature Alps Slovenia ndërsa promovimi i Shqipërisë do vijojë së afërmi me Moskën dhe vende të tjera.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.