OFL dhe Antimafia, 25 milion dollarë të sekuestruara – Zbardhen të dhënat: 230 pasuri të bllokuara, toka, apartamente, hotele e makina
Përmes Operacionit Forca e Ligjit dhe Antimafias, janë vënë nën sekuestro 230 pasuri me vlerë afërsisht 25 milionë dollarë. Scan Televizion ka zbardhur të plota llojet e pasurive të vëna nën sekuestro dhe vlerat e tyre financiare
230 pasuri të vëna me veprimtari të dyshimta janë vënë nën sekuestro gjatë vitit 2020 dhe I janë kaluar Agjencisë së Administrimit të Pasurive të Sekuestruara e të Konfiskuara. Scan Televizion ka zbardhur të dhënat zyrtare të kësaj agjencie, sipas të cilave shuma totale e vënë nën sekuestro dhe e kaluar nën adinistrimin e shtetit është rreth 2.6 miliardë lekë, afërisht 25 milionë dollarë. Pjesa më e madhe është prodhuar nga sekuestrot e vëna përmes Operacionit Forca e Ligjit. Nga të dhënat e Agjencisë rezulton se bëhet fjalë për:
- 62 automjetet me një vlerë të përafërt prej 72,501,770 lekë,
- 14 apartamente me vlerë të përafërt prej 52,796,550 leke,
- 12 njësi tregtarë me vlerë të përafërt prej 75,534,401 lekë,
- 12 ndërtesa me vlerë të përafërt prej 226,870,733 leke,
- 30 toka dhe truaj me vlerë të përafërt prej 259,946,746 lekë,
- 8 biznese me vlerë të përafërt prej 271,812,880 lek
Agjencia sqaron se janë në process saktësimi, vlerësimi apo legalizimi 12 pasuri, vlera e të cilave nuk është përfshirë në tabelë.
Pjesa tjetër e pasurive janë marrë në administrim me ligjin nr. 10192, date 3.12.2009 “Për parandalimin dhe goditjen e krimit të organizuar dhe trafiqeve nëpërmjet masave parandaluese kundër pasurisë”, I njohur si ligji antimafia. Konkretisht bëhet fjalë për:
- 19 njësi tregtarë me vlerë të përafërt prej 162,057,674.00 lekë,
- 21 automjete me vlerë të përafërt prej 111,263,585.00 lekë,
- 9 toka dhe truaj me vlerë të përafërt prej 309,423,249.00 lekë.
Ndërkohë janë në proces saktësimi, vlerësimi apo legalizimi 11 biznese, vlera e të cilave nuk është përfshirë në tabelë.
Ndërkaq, nga 2011 deri në qershor të këtij viti arrin në total 54 milionë euro vlera e aseteve të luajtëshme e të paluajtëshme të bllokuara për llogari të Agjencisë së Administrimit të Pasurive të Sekuestruara e të Konfiskuara. Scan Televizion ka zbardhur të dhënat e përditësuara të Agjencisë deri më 1 qershor të këtij viti, sipas të cilave, 20 milionë euro pasuri janë konfiskuar përfundimisht, ndërkohë që 24 milionë euro të tjera është revokuar masa e sekuestros.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.