OKB paralajmëron: Pandemia e Koronavirusit po shndërrohet në krizën e të drejtave të njeriut
Pandemia e koronavirusit nuk duhet të përdoret si pretekst për shtetet autoritare që të shkelin të drejtat e njeriut, ose të shtypin rrjedhën e lirë të informacionit, paralajmëroi sekretari i përgjithshëm i KB, António Guterres në një përpjekje të re për të shtuar ndikimin e KB-së në përballimin e krizës. Ai tha se ajo që kishte filluar si emergjencë e shëndetit publik po kthehej shpejt në një krizë të të drejtave të njeriut.
Përgjigjet e qeverisë ndaj krizës janë vlerësuar si disproporcionale në vende si Kina, India, Hungaria, Turqia dhe Afrika e Jugut. Guterres tashmë ka bërë thirrje për një armëpushim global, dhe ka paralajmëruar një rritje të dhunës në familje si rezultat i virusit, por KB-të kolektivisht janë kritikuar që nuk kanë pasur ndikim në krizë.
Në ndërhyrjen e tij të fundit, ai paralajmëroi se “virusi po sjell një ndikim disproporcional në komunitete të caktuara përmes rritjes së gjuhës së urrejtjes, shënjestrimit të grupeve të cenueshme dhe rreziqeve të përgjigjeve të rënda të sigurisë që dëmtojnë përgjigjen shëndetësore”.
Në raportin e ri mbi Covid-19 dhe të drejtat e njeriut, KB theksoi përdorimin e frazave të tilla si “sëmundja e të huajve” për të përshkruar virusin, duke thënë se vërejtje të tilla mund të çojnë në diskriminim, ksenofobi, racizëm dhe sulme.
Duke publikuar raportin, Guterres bëri thirrje që çdo gjendje e jashtëzakonshme të jetë proporcionale dhe e kufizuar me kohë, me një fokus të veçantë dhe kohëzgjatje. Liria e lëvizjes duhej të kufizohej, pranoi ai, por tha që shkalla e kufizimeve të tilla mund të zvogëlohet me teste më efektive dhe masa karantine të përqendruara. Ai njoftoi se mbi 131 vende kanë mbyllur kufijtë e tyre, me vetëm 30 vende që kanë autorizuar hyrjet për azilkërkuesit.
Sipas KB mijëra njerëz, “janë kthyer mbrapsht ose dëbuar në mjedise të rrezikshme që prej fillimit të krizës. KB theksoi se ndonjëherë nën pretekstin e lajmeve të rreme, gazetarët, mjekët, punonjësit e kujdesit shëndetësor dhe aktivistët ose opozita politike po arrestoheshin. Gjithashtu mbikëqyrja në internet dhe politika agresive në internet ishin në rritje.
Zgjidhja më e mirë, tha Guterres, ishte që qeveritë të ishin të hapura dhe transparente në lidhje me përpjekjet e tyre për të kufizuar virusin, përfshirë këtu duke lejuar që opozitat e tyre ose grupet e shoqërisë civile të shqyrtojnë ekzekutivin në internet.
Megjithëse KB pranoi se teknologjitë e reja mund të ndihmojnë në luftën kundër virusit, përfshirë analizat për përhapjen e tij, “përdorimi i inteligjencës artificiale dhe të dhënave thelbësore për të zbatuar masa emergjente ose për të gjurmuar popullatat e prekura krijojnë shqetësime,” paralajmëroi ai.
Raporti i KB shënon më tej se “mundësia e abuzimit është e lartë: ajo që justifikohet gjatë një emergjence tani mund të normalizohet pasi të ketë kaluar kriza. “Pa mbrojtje adekuate, këto teknologji të fuqishme mund të shkaktojnë diskriminim, të jenë ndërhyrës dhe të cenojnë privatësinë, ose mund të vendosen/përdoren kundër njerëzve ose grupeve për qëllime që shkojnë përtej përgjigjes së pandemisë.”(TheGuardian)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.