OKB: Varësi të lartë nga importet – Karakteristikë e vendeve më pak të zhvilluara, më mirë Maqedonia e Serbia
Raporti më i fundit i Kombeve të Bashkuara e klasifikon Shqipërinë në rangun e atyre shteteve që kanë një varësi të lartë ndaj importet e lëndëve të para. Shqipëria klasifikohet në rangun e ekonomive në tranzicion. Raporti që mban titullin “lëndët e para dhe zhvillimi” është publikuar nga Konferenca për Tregti dhe Zhvillim, si dhe Organizata për Ushqim dhe Agrobujqësi e Kombeve të Bashkuara.
Vendet e tjera të rajonit ndërkohë, që po ashtu si Shqipëria janë në rangun e ekonomive në tranzicion dhe vendeve në zhvillim, klasifikohen si më poshtë; Mali i Zi dhe Bosnje Hercegovina në të njëjtat pozita me ne, pra vende që kanë një varësi të lartë nga importet, ndërsa Maqedonia dhe Serbia klasifikohen ndër vendet që kanë një varësi të ulët ndaj importit të lëndëve të para.
Raporti i Kombeve të Bashkuara arrin në përfundimin se, varësia e lartë nga importet është një karakteristikë e vendeve më pak të zhvilluara dhe se diçka e tillë ka një lidhje të drejtpërdrejtë me indeksin e zhvillimit njerëzor. Në të gjithë botën, janë vetëm 14 shtetet që klasifikohen në të njëjtat pozita me vendin tonë.
Duke qenë se lëndët e para kanë luhatje të theksuara, mjafton një krizë në një prej lëndëve të para që të shkaktojë pasoja në vende si ne, që kanë varësi të lartë nga importet.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.