OPEC mbështet naftën – Numri i puseve aktive në SHBA bie me 9 njësi
Çmimet e naftës e kanë filluar javën në rritje, për shkak të komenteve të ministrit të Naftës në Arabinë Saudite, Khalid al-Falih, i cili tha se marrëveshja për uljen e prodhimit nuk do të mbyllet përpara qershorit.
Gjithashtu, edhe rënia e aktivitetit të shpim-kërkimit në SHBA ka ndikuar në rritjen e çmimeve. Nafta Bruto amerikane po tregtohet në rreth 56.4 dollarë për fuçi, ndërsa nafta Brent e Londrës po tregtohet në rreth 66.2 dollarë për fuçi. Megjithatë, fitimet po kufizohen nga të dhënat e publikuara në SHBA mbi punësimin, që kanë shtuar shqetësimet se ngadalësimi në Azi dhe Europë është përhapur edhe në ekonominë më të madhe në botë.
Gjithashtu, një shenjë tjetër që konfirmoi ngadalësimin e ekonomisë kineze ishte rënia e shitjes së automjeteve me 14%, në shkurt, krahasuar me të njëjtën periudhë të një viti më parë. Ky ishte muaji i tetë me radhë në rënie, për tregun më të madh të automjeteve në botë. Në anën tjetër, shitja e automjeteve të reja elektrike u rrit me 54%, gjatë muajit të kaluar. Gjithsesi, tregu vijon të mbështetet nga marrëveshja e OPEC dhe Rusisë për të ulur prodhimin me 1.2 milionë fuçi naftë në ditë.
Vendet prodhuese të naftës do të takohen sërish në Vjenë më 17-18 prill, për të diskutuar politikat e furnizimit të tregut. Referuar të dhënave të publikuara në SHBA, gjatë javës së kaluar, numri i puseve aktive ra me 9 njësi, në totalin e 834 puseve. Rritja e aktivitetit të shpim-kërkimit gjatë vitit të kaluar, bëri që Amerika të prodhojnë rreth 12.1 milionë fuçi në ditë, duke lënë pas Rusinë dhe Arabinë Saudite.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.