Operacioni Anti-Informalitet/ Drejtoresha e Tatimeve në terren për deklarimin e pagave dhe zbatueshmërinë e ligjit: ‘’Ja sektorët ku do fokusohemi’’

Operacioni i Anti-Informalitetit në Republikën Shqipërisë ka qenë një nga aksionet kryesore që Ministria e Financave dhe Ekonomisë ka ndërmarrë gjatë këtij viti.

Sipas raporteve të publikuara nga vetë qeveria ky problem vazhdon të mbetet i madh në shumë sektorë të ekonomisë, duke u kthyer në një fenomen shqetësues.

Në pjesën e parë të vitit, ka qenë vetë ministrja, Anila Denaj së bashku me strukturat e linjës që kanë përgatitur një plan operacion për sektorët: turizëm, ndërtim dhe 3 nënprodukte të akcizës (karburanti, cigarja dhe pijet alkoolike), duke ndëshkuar bizneset deri në mbyllje të aktivitetit.

Së fundmi Drejtoresha e Përgjithshme e Tatimeve, znj. Delina Brahimaj së bashku me kryeinspektorin e Inspektoriatit Shtetëror të Punës dhe Shërbimeve Shoqërore, z.Arben Seferaj kanë bërë të qartë planin për pjesën e mbetur të vitit 2019.

Ky aksion në këtë pjesë të mbetur do të fokusohet në tre sektorë të veçantë, si call center-at, fasoneria dhe ndërtimi:

“Kemi evidentuar sektorin e call center, fasonerisë dhe ndërtimit, të cilët janë tre sektorë me numër të lartë punonjësish. Nga analizat e riskut të Drejtorisë së Përgjithshme të Tatimeve kemi evidentuar se janë gjithsej 292 tatimpagues të cilët operojnë në fushën e call center.”

“Fokusi është që informaliteti të ulet, të punësuarit të deklarohen dhe sigurimet shoqërore të paguhen për këto të punësuar, aq sa është paga reale e tyre”, u shpreh znj. Ibrahimaj.”

Përkundrazi fenomenit të zakonshëm të penalizimit nëpërmjet gjobave, zyrtarja e lartë u shpreh se qëllimi i vërtetë i këtij aksioni është vetëm ndërgjegjësimi:

“Qëllimi ynë është që të gjithë këto tatimpagues që operojnë në këto fusha të vetëdeklarohen, të vetërregullohen dhe tu japim kohë që ato të zbatojnë ligjin, pasi nuk kemi për qëllim gjobitjen e këtyre tatimpaguesve, por kemi për qëllim ndërgjegjësimin e tyre me qëllim që ligji të respektohet në të gjithë format e veta”, – u shpreh Drejtoresha e Tatimeve.

Nga ana e tij, Kryeinspektori Arben Seferaj bëri me dije se që nga data 1 korrik  Inspektoriati ka inspektuar në total 3242 subjekte, nga të cilët 1606 subjekte janë konstatuar me punëmarrës informalë dhe në 1491 raste apo në 46 % të subjekteve të kontrolluara janë marrë masa administrative, pasi kanë rezultuar me problematika në raport me zbatueshmërinë e ligjit.

“Për 58.875 punëmarrës gjithsej është verifikuar marrëdhënia e punës së tyre, ku rezultojnë 1896 punëmarrës të pasiguruar dhe të padeklaruar në skemën e sigurimeve shoqërore e shëndetësore. Shifra e informalitetit të evidentuar është në masën 29 % në 1066 subjekte kontrolluar, të cilët kanë rezultuar me 6432 punëmarrës. Pra, këto subjekte kanë pasur dhe pjesën më të madhe të informalitetit”, u shpreh z. Seferaj, ndërsa theksoi se janë këshilluar 1753 subjekte për zbatimin e legjislacionit të punës përmes dhënies së këshillave në dokumentacionin e inspektimit dhe përmes shpërndarjes së fletëpalosjeve informuese në lidhje me detyrimet dhe të drejtat që kanë punëdhënësit dhe punëmarrësit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.