Operacioni “Forca e Ligjit”, hapen aplikimet për të qenë pjesë e Task-Forcës Speciale. Kush mund të kandidojë, dokumentet dhe kriteret
Nisin aplikimet në radhët e punonjësve të Policisë Shtetit për të qenë pjesë e Task-Forcës Speciale Qendrore dhe Vendore.
Aplikimet bëhen në kuadër të operacionit “FORCA E LIGJIT”. Lajmi është dhënë në një njoftim të Ministrisë së Punëve të Brendshme, ku janë specifikuar dokumentet dhe kriteret që duhen përmbushur në radhët e punonjësve të policisë.
“Me qëllim, përzgjedhjen e kapaciteteve më të mira të Policisë së Shtetit për të qenë pjesë e këtyre Task Forcave, si dhe në kuadër të transparencës, njoftohen punonjësit e policisë të interesuar të kandidojnë për specialist hetimi pranë Task Forcës Speciale Qendrore dhe Vendore, që brenda datës 30 Dhjetor 2017, të shprehin interesin e tyre përmes një kërkese me shkrim drejtuar Drejtorisë së Përgjithshme të Policisë së Shtetit, Departamentit për Hetimin e Krimit të Organizuar dhe Krimeve të Rënda, Bulevardi “Bajram Curri”, Tiranë”, thuhet në njoftimin e MPB.
Dokumentet
Krahas kërkesës me shkrim, të interesuarit duhet të bashkëngjisin dokumentet e mëposhtme:
– Jetëshkrimin e përditësuar, pozicionet dhe detyrat që ka pasur CV.
– Vlerësimin e punës nga Titullari i Institucionit.
Kriteret që duhen përmbushur
Kandidati i interesuar duhet të plotësojë kriteret e mëposhtme:
- Të ketë punuar në strukturat qendrore apo vendore kundër drogës, trafiqeve, krimet e rënda dhe krimit ekonomik për të paktën 3 vjet.
- Të jetë trajnuar për aspektet e veçanta të hetimit të veprave penale në këto fusha.
- Të ketë integritet dhe përkushtim.
- Të ketë pasur rezultate konkrete në punë dhe të rezultojë i suksesshëm në hetime ndjekura.
- Të mos jetë nën efektin e ndonjë mase disiplinore.
Kandidatët preferohen:
– Të kenë mbaruar studimet në drejtësi, bachelor ose master në drejtësi.
– Të zotërojë gjuhë të huaj anglisht.
Shprehja e interesit dhe dokumentet shoqëruese duhet të dërgohen:
– në adresën elektronike: [email protected],
– si dhe në adresën postare: Departamenti për Hetimin e Krimit të Organizuar dhe Krimeve të Rënda, Drejtoria e Përgjithshme e Policisë së Shtetit, Bulevardi “Bajram Curri”, Tiranë.
os.de/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.