“Opozita, në kuvend në 2021” – Rama, thirrje PD dhe LSI të marrin pjesë në zgjedhjet vendore

Kryeministri Edi Rama është shprehur i prerë në lidhje me kërkesën e opozitës për zhvillimin e zgjedhjeve të parakohshme dhe krijimin e një qeverie tranzitore. Nga foltorja e parlamentit, Rama tha se e mira e opozitës është të hyjnë në zgjedhje vendore, ndërsa shtoi se, me apo pa opozitën, procesi do të kryhet në afatin e caktuar.

Gjithashtu, kryeministri tha se, mandati që i kanë dhënë shqiptarët për të qeverisur nuk negociohet, duke paralajmëruar se opozita nuk mund të futet në parlament përpara vitit 2021.

Projektligji më i rëndësishëm që u diskutua ishte ai për ndryshimet në vettingun për policinë e shtetit, që u miratua me 78 vota pro, 4 abstenim dhe 6 kundër. Mes atyre që abstenuan ishte edhe ish-ministri i Brendshëm Fatmir Xhafaj, i cili doli kundër ndryshimeve në ligj, të bëra nga pasardhësi i tij, Sandër Lleshaj. Gjithashtu, Kuvendi miratoi me 88 vota pro projektligjin “për ratifikimin e marrëveshjes së financimit mes qeverisë shqiptare, qeverisë së Malit të Zi dhe Komisionit Europian, për programin e bashkëpunimit ndërkufitar IPA II.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.