Optimizëm për aksionet europiane – Investitorët presin që fitimet e korporatave të kompensojnë “korrigjimin”

Tregtuesit europian presin që raportimet e fundit nga korporatat të nxisin besimin në titujt e kapitalit të rajonit. Sezoni i raportimeve për tremujorin e parë ka marrë vrull në një kohë të vështirë për aksionet e Eurozonës.

Valuta është tregtuar mbi 1.22  kundrejt dollarit për pjesën më të madhe të 2018-ës, duke shkaktuar presione te bilancet e firmave eksportuese. Vrulli ekonomik ka nisur gjithashtu të ngadalësohet nga perfromanca fantastike e vitit të kaluar.

Për  rrjedhojë, indeksi i gjerë i titujve europian, Stoxx Europe 600,  nuk ka arritur të rikuperojë humbjet që ndodhën pas shitjes nën panik të muajit Janar.

Fitimet sipër projeksioneve te korporatat mund të rikthejnë optimizmin e investitorëve në gjysmën e dytë të vitit, ku pritet edhe stabilizimi i valutës dhe ekonomisë.

Banka amerikane e investimeve, JPMorgan pret surpriza në këtë sezon të raportimeve dhe ka ruajtur projeksionin për një rritje të fitimeve prej 14% në 2018-ën, bazuar te indeksi Stoxx 600.

Peshat e rënda të industrive si Ericsson, LVMH dhe Royal Philips kanë thyer projeksionet deri më tani, ndërsa L’Oreal, pati rënie të të ardhurave nga fuqizimi i valutës.

Sipas analistëve, rezultatet e ndara në sektorë vënë në dukje efektet negative të një mjedisi ekonomik të fragmentizuar.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.