Optimizëm për bankat greke – S&P rrit vlerësimin e kreditit për huadhënësit në B-
S&P ka rritur vlerësimin e kreditit afat-shkurtër dhe afat-gjatë për 4 banka të Greqisë; Alpha Bank, Eurobank, NBG dhe Pireaus Bank, në B- nga CCC+ dhe rriti perspektivën në të qëndrueshme.
Agjencia lajmëroi e ka rritur gjithashtu vlerësimin për borxhin e varur të bankave në CCC, nga CC dhe konfirmoi vlerësimin e aksioneve të preferuara të Alpha Bank në D. Këto përditësime vijnë pas përfundimit me sukses të rishikimit të katërt të programit të shpëtimit.
“Këto rritje të vlerësimeve reflektojnë gjithashtu përmirësimin e likuiditetit dhe fuqizimin e ekonomisë, që pritet të mbështesin kapacitetin e bankave greke dhe të përmirësojnë bilancet në afat-gjatë. Ne presim që besimi i depozituesve dhe investitorëve për sektorin bankar të përmirësohet”, deklaroi Standard & Poor’s.
Sipas agjencisë, rritja e besimit dhe rënia e kontrolleve të kapitalit do të përmirësojnë fluksin e depozitave dhe aksesin e bankave në tregjet e kapitalit.
Agjencia vlerësoi se rreth 13 miliardë euro apo 9% e depozitave, janë rikthyer te bankat greke në 1 vit dhe huadhënësit kanë ulur varësinë ndaj likuiditetit të ofruar nga Banka Qendrore Europiane me 63%, apo 36 miliardë euro.
“Presim që trendi të vazhdojë, duke përmirësuar pozitat e likuiditetit të bankave. Por rimëkëmbja do të jetë graduale duke marrë parasysh goditjen e rëndë të sektorit privat nga kriza ekonomike. Për rrjedhojë, nuk presim rikthimin e plotë të rreth 49 miliard euro depozita që humbën në Nëntor 2014 – Korrik 2015”, deklaron Agjencia.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.