Optimizëm për transportin ajror, IATA: Rënia e naftës dhe rritja ekonomike do nxisin fitimet e industrisë

Fitimi  i industrisë globale të transportit ajror pritet të arrijë në 35.5 miliardë dollarë në vitin 2019, sipër 32.3 miliardë që pritet të mbyllet ky vit, sipas Shoqatës Ndërkombëtare të Transportit Ajror.

Numri i pasagjerëve pritet të rritet gjithashtu me 5.7% në 4.59 miliardë në vitin e ardhshëm dhe fitimi neto për pasagjerë, në 7.75 dollarë.

Drejtori i Përgjithshëm i Shoqatës Ndërkombëtare të Transportit Ajror, Alexandre de Juniac, tha se rënia e papritur e çmimeve të naftës si dhe rritja ekonomike globale, do të ofrojnë nxitje për industrinë

“Ne prisnim që rritja e kostove do të ulte përfitueshmërinë në vitin 2019. Por, rënia e çmimeve të naftës dhe projeksionet e qëndrueshme për rritjen e PBB do të kontribuojnë në rritjen e industrisë. Jemi optimist se krijimi i qëndrueshëm i vlerës për investitorët do të vazhdojë edhe për një vit të paktën. Ekzistojnë edhe rreziqe në mjedisin politik dhe ekonomik”, Alexandre de Juniac, drejtori i IATA.

Nxitësi kryesor i performancës për vitin 2019 vlerësohet të jetë rënia e çmimeve të naftës.  Parashikimet për vitin e ardhshëm janë bazuar me një çmim mesatar prej 65 dollarë për fuçi të naftës Brent, që është në rënie nga 73$ që ka qenë përgjatë 2018-ës.  Rritja ekonomike projektohet në 3.1% për vitin 2019.

Rritja më e ngadaltë por e qëndrueshme, vazhdon të jetë një nxitës i fortë i përfitueshmërisë në industrinë e transportit ajror.

Punësimi total nga kompanitë ajrore pritet të arrijë në 2.9 milionë në vitin e ardhshëm nga 2.2 milionë këtë vit dhe pagat janë gjithashtu në rritje, duke reflektuar tkurrjen e tregut të punës.

Shoqata Ndërkombëtare e Transportit Ajror bëri gjithashtu të ditur se numri i pasagjerëve parashikohet në rritje me 6% në vitin 2019 dhe qëndron sipër trendit 20-vjeçar të rritjes.

Sipas raportit, të gjithë rajonet pritet të raportojnë fitime në këtë vit edhe tjetrin, përveç Afrikës. Amerika e Veriut do të vazhdojë të kryesojë në performancë financiare, duke zënë thuajse gjysmën e fitimeve të industrisë.

Në Europë, fitimi neto pritet të bie në 7.4 miliardë dollarë, ndërkohë që konkurrenca e ashpër po ul kthimet dhe rrit kostot rregullatore.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.