Ora nuk ndryshon më! – Juncker: Europa të qëndrojë gjithmonë me orën verore

Bashkimi Europian duhet të braktisë praktikën e ndryshimit të orës dy herë në vit dhe t’i mbajë akrepat në orën verore apo ligjore, sipas Komisionit Europian.  Komisioni Europian publikoi rezultatet e një konsulte me publikun për  praktikën e shfrytëzimit të orëve të ditës duke lëvizur akrepat 60 minuta përpara mes Marsit dhe Tetorit.

“U zhvillua një sondazh publik, miliona njerëz u përgjigjën dhe treguan se është ora verore që duhet të përdoret gjatë gjithë kohës në të ardhmen. Këtë duan njerëzit dhe ne do ta bëjmë”, tha presidenti i Komisionit, Jean-Claude Juncker përpara publikimit të rezultateve.

Komisioni deklaroi se ka marrë 4.6 milionë përgjigje për këtë çështje nga 28 vendet anëtare, që është numri më i madh i reagimeve në histori nga një konsultë publike. Sipas rezultateve paraprake, 84% e të anketuarve favorizonin përfundimin e ndryshimit të orës.

Ndërkohë që çdo vend i Bashkimit Europian mund të zgjedhë zonën kohore, ndryshimi nga ora verore në orën diellore është i rregulluar nga organet qendrore, për të shmangur diferencat në tregun e përbashkët europian.

Propozimi i Komisionit Europian për t’i dhënë fund ndryshimit të akrepave të orës kërkon miratim nga qeveritë kombëtare dhe Parlamenti Europian. Më shumë se 75% e të anketuarve treguan se ndryshimi i orës dy herë në vit është një eksperiencë tejet negative, me ndikime shëndetësore, rritje të aksidenteve në rrugë dhe mungesë të kursimit të energjisë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.