OSHEE, kredi 70 milionë euro nga BERZH – Reagim ndaj krizës së shkaktuar nga COVID-19, dha pasoja të rënda në stabilitetin financiar
Operatori i Shpërndarjes së Energjisë Elektrike do të marrë një hua prej 70 mln euro nga Banka Evropiane për Rindërtim dhe Zhvillim, që do të shkojë për financimin e projektit për reagimin ndaj krizës së shkaktur nga COVID-19.
Marrëveshja e huasë është nënshkruar në datën 8 shtator të këtij viti, teksa ka mbërritur në Kuvend për diskutim. Sipas relacionit shoqërues, ky financim përbën në detyrim të drejtpërdrejtë për OSHEE-në, kundrejt BERZH-it , por në rast të pamundësisë për të shlyer detyrimet nga OSHEE-ja, detyrimet e kredisë do të duhet të paguhen nga buxheti i shtetit, mbështetur në marrëveshjen e garancisë, që gjithashtu është nënshkruar në 8 shtator.
Sipas relacionit, shoqëria OSHEE gjatë vitit 2020 është përballur jo vetëm me situatën e thatësirës së jashtëzakonshme, por kësaj situate iu shtua dhe situata e Covid-19, e cila pati efekte shtesë negative në financat e OSHEE Group, duke e përballur shoqërinë me një situatë të paimagjinueshme më parë. Sipas dokumentit, OSHEE Group, ka marrë menjëherë masa të jashtëzakonshme për përballimin e situatës, duke pezulluar totalisht planin e investimeve për vitin 2020.
Por këto masa zgjidhin situatën momentale të OSHEE-së për tejkalimin e situatës, por dhanë pasoja të rënda në stabilitetin teknik e financiar, si dhe arritjes së treguesve të saj, bazuar në planin e konsolidimit financiar të sektorit. Ndërkohë që, nëpërmjet këtij financimi, OSHEE-ja jo vetëm siguron sa më sipër, por garanton që do ta përballojë me sukses ripagimin e kësaj kredie me fondet e aktivitetit të saj.
Ola Mitre/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.