Oxfam thirrje përpara “WEF” – “Shtimi i miliarderëve në 2017 ka thelluar pabarazinë botërore”
Ekonomia botërore ka krijuar një numër rekord miliarderësh vitin e kaluar, gjë që ka thelluar pabarazinë duke ulur të drejtat e punonjësve dhe nxitur përpjekjet e kompanive për të maksimizuar kthimet për aksionerët.
Sipas një raporti të organizatës ndërkombëtare Oxfam, bota mban tashmë 2,043 miliarderë, ndërkohë që një i ri është krijuar çdo dy ditë gjatë 2017-ës.
Ky grup, ku pjesën më të madhe e zënë burrat (1,816), ka patur një rritje të pasurisë me 762 miliardë dollarë, që sipas Oxfam, është një sasi më se e mjaftueshme për të përfunduar varfërinë ekstreme në të gjithë botën.
Kjo po lejon një elitë të vogël që të akumulojë pasuri gjigante, ndërkohë që 82% e pasurisë së krijuar në vitin 2017, ka shkuar te 1% e popullsisë globale.
Oxfam e ka publikuar raportin përpara mbledhjes së liderëve globalë në Davos, për “Forumin Ekonomik Botëror”, duke i bërë thirrje për krijimin e një bote më të drejtë dhe përfundimin e varfrërisë.
“Boom-i i miliarderëve nuk është shenjë e lulëzimit të ekonomisë por një simptomë e dështimit të sistemit ekonomik”, tha Winnie Byanyima, kreu ekzekutiv i Oxfam. Ndër të tjera sugjerime, organizata rekomandoi eliminimin e hendekut gjinor në paga dhe rritjen e taksave te të pasurit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.