Pa fitues tenderi për ndërtimin e shkollave në Zonën Tirana 3 me PPP
Megatenderi prej 1.62 miliardë lekësh për ndërtimin e shkollave të reja në Zonën Tirana 3, pas shqyrtimit të ofertave nga Komisioni i Koncesionit/PPP, ka rezultuar pa asnjë fitues.
Për shkak se asnjë ofertë e paraqitur rezultoi e vlefshme, Komisioni vendosi të anullojë koncesionit publik.
Katër objektet arsimore do të duhet të ndërtoheshin në njësitë administrative nr.2 dhe nr.5, konkretisht një shkollë 9-vjeçare dhe një gjimnaz pranë rrethrrotullimit të Saukut; një shkollë 9-vjeçare pranë Liqeni Artificial dhe një shkollë 9-vjeçare në Farkë.
Operatori që do të shpallej fitues do të përballonte me të ardhurat e veta të gjithë investimin për projektimin, ndërtimin, mobilimin, pajisjen me laboratorë, mirëmbajtjen, mbikëqyrjen dhe kolaudimin si dhe vënien në funksion të katër objekteve mësimore. Pas ndërtimit, kjo kompani do të shërbente si administratore e godinave arsimore për 7 vite, deri në shlyerjen e vlerës së përcaktuar në tender.
Anullimi i procedurave të këtij tenderi vjen 1 javë pas shpalljes së fituesit për kontratën e ngjashme PPP në Zonën Tirana 1. Me shumë gjasa pritet që Bashkia të rihapë procedurat për këtë tender, pra nuk do të kemi një anulim përfundimtar të projektit për ndërtimin e këtyre katër godinave arsimore.
A.H./SCAN
[FOTO] Ja si do të jenë shkollat e reja në Tiranë – Boeri, arkitekti i shkollës në Don Bosko, Kodër-Kamëz dhe Sheshin Shqiponja
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.